Blinken Əliyev və Paşinyanla danışıb, müharibəni dayandırmağa, dialoqu bərpa etməyə çağırıb

Bakı/20.09.23/Turan:  Ağ Ev Dağlıq Qarabağda düşmənçiliyin artmasından "ciddi narahatlığını" bildirib, Azərbaycanı hərbi əməliyyatları "dərhal dayandırmağa" və danışıqlar masasına qayıtmağa çağırıb. Bu barədə ABŞ Milli Təhlükəsizlik Şurasının mətbuat katibi Adrien Vatsonun bəyanatında deyilir.

Bu bəyanatdan öncə dövlət katibi Entoni Blinken prezident İlham Əliyev və baş nazir Nikol Paşinyanla telefonla danışıb.

Blinken Azərbaycanı hərbi əməliyyatı dayandırmağa çağırıb, Dövlət Departamentinin mətbuat katibi Metyü Miller bildirib.

Blinken deyib ki, münaqişənin hərbi həlli yoxdur və tərəflər Bakı ilə Qarabağ erməniləri arasındakı mühüm ziddiyyətləri yoluna qoymaq üçün dialoqa qayıtmalıdırlar.

Prezident Əliyev hərbi əməliyyatların dayandırılmasına, Azərbaycan və Qarabağ əhalisinin nümayəndələrilə görüşün keçirilməsinə hazır olduğunu bildirib. O qeyd edib ki, bunu dərhal etmək lazımdır, Miller deyib.

Paşinyanla söhbət zamanı Blinken ABŞ-ın hazırkı vəziyyətdən ciddi narahatlığını ifadə edib və deyib ki, Vaşinqton Bakını hərbi əməliyyatları dayandırmağa və dialoqa qayıtmağa çağırıb.

"O qeyd edib ki, ABŞ Ermənistanın suverenliyini və ərazi bütövlüyünü tam dəstəkləyir",- Miller vurğulayıb. 0