Blinken: “Putin uğursuzluğa uğrayıb”

Vaşinqton/16.09.23/Turan: Cümə günü ABŞ-ın baş diplomatı bildirib ki, Putin Ukraynada nail olmaq istədiyi şeydə "uğursuzluğa düçar olub", Turan-ın Vaşinqton müxbiri məlumat verib.

"Putinin məqsədi Ukraynanı xəritədən silmək, onun müstəqilliyini ləğv etmək, Rusiyaya tabe etdirmək idi. Ancaq baş tutmadı və uğur qazana bilmir", - dövlət katibi Entoni Blinken Almaniyanın xarici işlər naziri Annalena Berbok ilə birgə mətbuat konfransında bildirib.

İki diplomat Ukraynaya uzunmüddətli dəstəyi və Kiyevin Rusiyanın hücumundan sonra ayaqda qalma bacarığını təsdiqləyiblər. Onlar qeyd ediblər ki, Ukraynaya dəstək silah tədarükü çərçivəsindən kənara çıxır və infrastrukturun bərpasını əhatə edir.

Berbok Rusiyanın dərin ərazilərinə çata biləcək uzun mənzilli raket sistemləri üçün Ukraynanın davam edən müraciətləri barədə sualı  cavablandırarkən deyib ki,  silah tədarükü Ukraynanın özünümüdafiə və Ukraynanın işğal olunmuş ərazilərinin geri qaytarılması üçün nəzərdə tutulub.

Blinken əlavə edib ki, Rusiyanın işğal etdiyi əraziləri geri qaytarmaqda Ukraynaya kömək etmək üçün mümkün olan hər şey ediləcək.

O qeyd edib ki, Ukraynaya müxtəlif silah sistemlərinin verilməsi "daim nəzərdən keçirilir".

Ukraynalıların onlardan səmərəli istifadə etmək imkanları olmalıdır, bəzən yeni, mürəkkəb sistemlər təlim tələb edir və biz, əlbəttə ki, bunu edirik", - o deyib.0