BMT-nin insan hüquqları üzrə ali komissarı Qarabağ münaqişəsi ərazisində dinc sakinlərin müdafiəsinə çağırıb

Cenevrə/09.10.20/Turan: BMT-nin insan hüquqları üzrə ali komissarı Mişel Başelet cümə günü Qarabağ münaqişəsi ərazisində dinc əhalinin iztirabları ilə bağlı həyəcan təbili çalıb.

Sentyabrın 27-də başlayan döyüşlərdən sonra şəhər və qəsəbələrə artilleriya zərbələri endirilib, nəticədə oktyabrın 8-i üçün uşaqlar da daxil olmaqla, 53-ə yaxın dinc sakin həlak olub, o qeyd edib.

“Mən münaqişə tərəflərinə fərqlilik, mütənasiblik və ehtiyatlılıq prinsiplərinə əməl etməklə, əhalinin olduğu ərazidə kütləvi qırğın silahının tətbiqinə yol verməməklə mülki şəxslərin və mülki infrastrukturun qorunması ilə bağlı beynəlxalq humanitar hüquq üzrə öhdəliklərinə riayət etməyi xatırladıram”, - o qeyd edib.

Ali komissar həmçinin diqqəti münaqişə zonasında kaset döyüş sursatlarının tətbiq edilməsi barədə məlumatlara yönəldib.

“Kaset silahları böyük meydanlara kiçik, bəzən parlaq və ya rəngli bomba atırır, onların çoxu bir anda partlamır, lakin öldürə və uzun illər şikəst edə bilər”, - o deyib.

“Belə döyüş sursatlarından istifadə dərhal dayandırılmalıdır. Mən həmçinin Ermənistanı və Azərbaycanı onların istifadəsini tamamilə qadağan edən kaset döyüş sursatlarına dair Konvensiyanı ratifikasiya etməyə çağırıram”.

“Nifrətin qızışdırılması qarşılıqlı dağıdıcı nifrətdən başqa heç nəyə gətirib çıxarmır.

Siyasi liderlər də daxil olmaqla, hər kəsdən insan hüquqlarının müdafiəsinə və münaqişənin siyasi həllinə yardıma yönələn konstruktiv dialoq tələb olunur”, - Başele deyib.

“Bu münaqişənin qurbanlarına, o cümlədən bu yaxınlarda baş vermiş hərbi əməliyyatlar nəticəsində zərər çəkmişlərə və üç onillikdən çox davam edən Dağlıq Qarabağ münaqişəsi ərzində zərərçəkənlərin tibbi xidmətə çıxış imkanları təmin edilməli, həmçinin onlara psixoloji dəstək göstərilməlidir”, - Başele vurğulayıb. -02D-