Hüquq müdafiəsi: “Barışıq həlak olanların cəsədlərinin mübadiləsi üçün normal praktikadır”

Bakı/09.10.20/Turan: Həlak olan hərbçilərin cəsədlərinin dəyişdirilməsi üçün texniki barışıq qısa müddətə - bir neçə saat, maksimum bir sutkalığa bağlanır. Bu fikri Turan agentliyinə hüquq müdafiəçisi, Humanitar Araşdırmalar Cəmiyyətinin rəhbəri Əvəz Həsənov bildirib.

Onun sözlərinə görə, bu, geniş yayılmış praktikadır və birinci Qarabağ müharibəsi zamanı, hətta ən amansız vaxtlarda da tətbiq edilib.

Belə barışığın bağlanması bu və ya digər tərəfin mövqelərinin zəifləməsinə və ya güclənməsinə səbəb ola bilməz. Münaqişə tərəfləri barışıq qüvvəyə mindiyi andan öz mövqelərdə qalırlar. Bundan sonra tərəflər silah olmadan öz hərbçilərinin cəsədlərini götürürlər. Tərəflər nəzarət etdikləri əraziyə qarşı tərəfin hərbçilərini buraxa bilər, yaxud cəsədləri özləri yığıb və düşmənə ötürə bilər. Bütün bu proses Qırmızı Xaçın vasitəçiliyi, köməyilə baş verir.

“Əlbəttə ki, heç bir tərəf onun ərazisində həlak olanların cəsədlərinin qalmasını istəmir. Burada humanitar aspekt var –cəsədlərin dəfn üçün qohumlarına verilməsi”, - Ə.Həsənov deyib.

Bundan əlavə, belə barışığın bağlanması Rusiyanın təşəbbüsünün dəstəklənməsi baxımından vacibdir.—06B-