Böyük Britaniya səfirliyi kraliça II Yelizavetanın doğum günü münasibətilə qəbul keçirib

Bakı/14.06.17/Turan: Böyük Britaniya səfirliyi iyunun 13-də axşam Birləşmiş Krallığın milli bayramı - kraliça II Yelizavetanın doğum günü münasibətilə təntənəli qəbul təşkil edib.

Böyük Britaniyanın Bakıdakı səfiri Kerol Krofts qeyd edib ki, bu il bayram tədbiri iki ölkə arasında diplomatik əlaqələrin qurulmasının 25 illiyinə təsadüf edib.

Tədbir iştirakçılarına - dövlət qurumları, biznes, vətəndaş cəmiyyəti, KİV, siyasi partiyalar, xarici diplomatik korpus nümayəndələrinə ikitərəfli əməkdaşlığın 25 illiyinə həsr olunan fotoslayd təqdim edilib.

Fotoslaydda 1992-ci ildə Əbülfəz Elçibəyin prezidentliyi dövründə keçmiş baş nazir Marqaret Tetçerin Bakıya səfərindən başlayaraq ikitərəfli münasibətlərə dair bütün vacib məqamlar öz əksini tapıb.

Azərbaycan xarici işlər nazirinin müavini Mahmud Məmmədquliyev Azərbaycan hökuməti adından təbriki çatdırıb.

O qeyd edib ki, ötən 25 ildə iki ölkə arasında münasibətlər fəal inkişaf edib və bunun bazasını enerji əməkdaşlığı təşkil edir. BP şirkəti Azərbaycanın iri enerji layihələrində iştirak edir.

Böyük Britaniya Azərbaycanda ən böyük xarici investordur. Hazırda Azərbaycanda Britaniya investisiyaları 23 mlrd. dollar təşkil edir.

"Biz istəyirik ki, bu əməkdaşlıq digər sahələrə, o cümlədən qeyri-neft sektoruna şamil edilsin", - M.Məmmədquliyev vurğulayıb.

O, Böyük Britaniyanın Azərbaycanın ərazi bütövlüyünü dəstəkləməsinin mühüm önəmini qeyd edib.

Tədbirdə Bakıda qastrolda olan "The Salamanca Band and Bugles of The Rifles" hərbi orkestrin çıxışı olub.-06C--