BQXK Ermənistanı və Azərbaycanı "humanitar konsensus" əldə etməyə çağırıb

Bakı/25.07.23/Turan: İsrarlı səylərə baxmayaraq, Beynəlxalq Qızıl Xaç Komitəsi (BQXK) hazırda Laçın dəhlizi və ya Ağdam da daxil olmaqla, istənilən digər marşrutlarla mülki əhaliyə humanitar yardım çatdırmaq iqtidarında deyil.

Bu barədə BQXK-nin bugünki məlumatında deyilir.

Təşkilat qərar qəbul edən müvafiq şəxsləri BQXK-nin bu bölgədə əsas humanitar əməliyyatlarını bərpa etməsinə icazə verməyə çağırır.

On minlərlə insan bu marşrutlarla onlara çatan humanitar yardıma ümid edir, deyə məlumatda bildirilir. Hazırda mülki əhali həyati əhəmiyyətə malik dərmanların və gigiyena vasitələri və uşaq məhsulları kimi əsas məhsulların çatışmazlığı ilə üzləşir.

Meyvə, tərəvəz və çörək getdikcə daha da çatışmır və bahalaşır, süd məhsulları, günəbaxan yağı, dənli bitkilər, balıq və toyuq kimi bəzi digər ərzaq məhsulları əlçatmazdır. BQXK-nin bu bölgəyə tibbi məhsullar və əsas qida məhsulları aparmasına sonuncu dəfə bir neçə həftə əvvəl icazə verilib.

"Bizim humanitar yardım daşıyan avtomobil karvanlarımız bu bölgədəki əhali üçün xilasedici dairədir. Bu avtomobil karvanlarının yolu bağlandığı üçün biz humanitar vəziyyətin daha da pisləşməsindən narahatıq. Biz ən çox öz-özünə kömək edə bilməyənlər üçün narahatıq. Xüsusən xəstələr və xroniki xəstəliyi olan insanlar, habelə yaşlılar, zəiflər və uşaqlar riskə məruz qalır. Burada fəaliyyət göstərə bilməyimiz üçün tərəflər humanitar konsensus əldə etməlidir. Bu, həyat xilasetmə işidir və onun davam etməsinə icazə verilməlidir", deyə BQXK-nin Avrasiya üzrə regional direktoru Arian Bauer bildirib.

Beynəlxalq humanitar hüquqa əsasən, tərəflər ehtiyacı olan mülki şəxslərə humanitar yardımın sürətli və maneəsiz çatdırılmasına icazə verməli və yardım etməlidir. Buraya dərmanlar və əsas məhsullar daxildir. 

BQXK-nin işi sırf humanitar xarakter daşıyır. Son bir neçə gün ərzində BQXK-nin 24 xəstəni Laçın dəhlizindən istifadə ilə təxliyə edə bilməsi, onların zəruri tibbi yardımı almasını təmin etməsi faktı ümid yaradır. Ümumilikdə, 2022-ci ilin dekabrından etibarən təşkilat təcili tibbi yardıma ehtiyacı olan 600-dən çox insanı təxliyə edib. BQXK tərəflərlə ikitərəfli dialoqunu davam etdirir və belə bir konsensus əldə edilən kimi humanitar işini davam etdirəcək, deyə BQXK-nin məlumatında bildirilir. 06В