BQXK rəhbəri Qarabağ münaqişə zonasında işin çətinlikləri barədə

Bakı/23.11.20/Turan: Beynəlxalq Qırmızı Xaç Komitəsi (BQXK) Dağlıq Qarabağ münaqişəsi rayonunda öz missiyasının tərkibini əhəmiyyətli dərəcədə artıracaq. BQXK prezidenti Peter Maurer RBK-ya bildirib.

Büdcənin artırılması haqda da qərar qəbul edilib. "Əgər müharibəyə qədər bizim regiondakı missiyamızın büdcəsi 10 mln. İsveçrə frankı (təxminən, $11 mln.) təşkil edirdisə, gələn il 45 mln. İsveçrə frankı ($49,4 mln.) təşkil edəcək. Yəni, biz öz iştirakımızı dörd dəfə artıracağıq. Bizim orada çox az adamımız vardı. İndi biz regiona əlavə olaraq 400-500 nəfər göndərməyi planlaşdırırıq",- Maurer bildirib.

BQXK missiyası əməkdaşlarının vəzifəsi münaqişənin bütün tərəflərdən zərər çəkənlərə kömək etmək olacaq. Təcili vəzifələrdən biri həlak olanların cəsədlərinin tapılması və identifikasiyasıdır. BQXK prezidentinin sözlərinə görə, tərəflərin hər biri öz nəzarətində olan ərazidə cəsədləri axtaracaq. "Çətinlik təmas xəttinin özündə, döyüşlərin olduğu cəbhə xəttindədir, orada minalar var, cəsədlərin axtarışı çox çətindir",- o deyib.

BQXK-nın bu iş üçün hazırlanmış protokolları və  yaxşı təcrübəsi var ki, "bu işi maksimum ləyaqətlə yerinə yetirsin, cəsədləri müəyyənləşdirərək qohumlarına versin".

Bu işin uzanması halında "ən xoşagəlməz nəticələr" mümkündür. "Torpaqda infeksiya ola bilər. Qış başlayana qədər cəsədlər aşkar edilməsə, identifikasiya  ilə bağlı çətinliklər yarana bilər. Çünki ehtimal var ki, qış üçün cəsədlərin çürüməsi başlayacaq. Və biz keçmiş təcrübəmizdən bilirik ki, əgər tez hərəkət etməsək, itkin düşmüş insanların məsələsi ilə bağlı gələcək diskussiyaları çətinləşdirəcəyik", - o, mümkün nəticələri sadalayıb.

1992-1994-cü illərdə birinci müharibədən sonra  BQXK-nın siyahılarında indiyədək itkin düşmüş 4500 nəfər var. Oktyabrın 21-də Ermənistanın Ətraf Mühit Nazirliyi Xəbərdarlıq edib ki, regionda gedən döyüşlərdə həlak olmuş insanlara görə Dağlıq Qarabağda humanitar və ekoloji fəlakət təhlükəsi var.

Noyabrın 16-da Ermənistanın baş naziri Nikol Paşinyan Qarabağda yüzlərlə erməni hərbçinin itkin düşdüyünü bildirib. Erməni tərəfdən həlak olanların sayı 2,4 min nəfərə yaxındır, o bildirib

Azərbaycan indiyə qədər həlak olmuş və itkin düşmüş şəxslər barədə məlumat verməyib. Rusiyalı sülhməramlıların köməyilə cəsədlərin mübadiləsi işi artıq başlayıb. -02D-