Bu dəfə də SMS-icazə alınması qaydaları sərtləşdirilib

Bakı/26.06.20/Turan: İyunun 25-də axşam Nazirlər Kabineti baş nazirin Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində xüsusi karantin rejiminin sərtləşdirilməsi ilə bağlı əlavə tədbirlər barədə sərəncamını dərc edib.

Artıq SMS-icazə almaq üçün sadəcə 8103 nömrəsinə bildiriş göndərmək kifayət deyil. İndi E-Təbib mobil tətbiqindən istifadə edilməlidir. Əvvəlcə tətbiqi telefona və ya İ-pad-ə yükləmək lazımdır. Daha sonra mobil telefon nömrəsi daxil edilməlidir. Bu nömrəyə gələn dörd rəqəmli kodu daxil etmək lazımdır.

Giriş etdikdən sonra “lisenziya razılaşma” bölməsinə daxil olunur, razılaşdıqdan sonra “təsdiq edirəm” düyməsi sıxılır. “Bluetooth” və “GPS” sistemi işlək vəziyyətə gətirilir: 1. açılan əsas səhifədə “icazələr” bölməsinə keçd edilir; 2. tələb olunan “FİN” kodu və doğum tarixi daxil edilir; 3. icazənin növü seçilir (1 və ya 2); “Göndər” düyməsi sıxılır.

“Təsdiq” və ya “İmtina” mesajı gələnə kimi gözləmə mesajı ekranda görünür. “Təsdiq” mesajı gəldikdən sonra icazə alınmış sayılır”.

Bu yeniliyin nə dərəcədə səmərəli olduğunu demək çətindir. Bu, insanların evdən çıxmasını nizamlamaq cəhdindən daha çox məhdudlaşdırıcı tədbirdir.

Belə çətin icazə alma forması yaşlı nəslin bir çox nümayəndələri və sadə telefon sahibləri üçün əlçatmazdır. İphone sahibləri üçün belə bu sistem sadə deyil, çünki ən az İOS 11 versiyasının mövcud olmasını tələb edir. Məsələn, İphone 5-ə İOS 11 sadəcə olaraq yüklənmir.

Bütün bunları nəzərə alaraq, evdən çıxmalı olanların əksəriyyətinin əvvəlki kimi 8103-ə SMS göndərməyə davam edəcəklərini ehtimal etmək olar. -02B-