C.Bayramov S.Lavrovla görüşə gedib

Bakı/04.12.22/Turan: Azərbaycanın xarici işlər naziri Ceyhun Bayramov dekabrın 4-də rusiyalı həmkarı Sergey Lavrovla görüşmək üçün Moskvaya gedib.

Dekabrın 5-də keçiriləcək görüşdə ikitərəfli əməkdaşlıq məsələlərinin müzakirəsi, regional və beynəlxalq gündəliyin aktual aspektləri, o cümlədən Azərbaycan-Ermənistan münasibətlərinin normallaşdırılması məsələləri üzrə fikir mübadiləsinin aparılması planlaşdırılır, Rusiya XİN-dən bildiriblər.

Rusiyanın xarici siyasət prioritetlərindən biri 9 noyabr 2020-ci il, 11 yanvar və 26 noyabr 2021-ci il və 31 oktyabr 2022-ci il tarixli yüksək səviyyəli üçtərəfli sazişlərə uyğun olaraq Azərbaycan və Ermənistan arasında münasibətlərin normallaşmasına kömək etməkdir.

“Biz onların həyata keçirilməsini Cənubi Qafqazda sülhün və sabitliyin təmin edilməsi, Bakı ilə İrəvan arasında etimadın və tam əməkdaşlığın bərpası üçün əsas şərt hesab edirik”, - xəbərdə  deyilir.

“Rusiyanın səylərinin ən mühüm sahəsi regionda nəqliyyat kommunikasiyalarının blokadadan çıxarılmasıdır. Biz dəmir yolu və avtomobil əlaqələrinin yaradılmasına imkan verəcək və əlaqələrin bərpasını stimullaşdıracaq konkret infrastruktur layihələri paketinin razılaşdırılması üzərində işləyirik.

Biz Azərbaycan-Ermənistan dövlət sərhədinin delimitasiyası üzrə ikitərəfli komissiyanın yaradılmasını alqışlayırıq. Delimitasiya prosesinin başlanması Azərbaycan və Ermənistan arasında sərhəd insidentlərinin dayandırılmasına töhfə vermək məqsədi daşıyır. Rusiya tərəflərin xahişi ilə lazımi məsləhətçi yardımı göstərəcək.

Azərbaycan və Ermənistan arasında sülh müqaviləsinin hazırlanması münasibətlərin əsas prinsiplərinin möhkəmləndirilməsi, uzunmüddətli perspektivdə qarşılıqlı faydalı əməkdaşlığın əsaslarının qoyulması məqsədi daşıyır. Rusiya Cənubi Qafqazda sülh və təhlükəsizliyin möhkəmləndirilməsi maraqları naminə bu çətin, lakin son dərəcə vacib prosesə hər cür köməklik göstərəcək”, - Rusiya XİN-in xəbərdə deyilir. -0-