Çexiyaya gedən azərbaycanlı turistlərin sayı azalır

Bakı/19.12.17/Turan: Son illər Çexiyanın Bakıdakı səfirliyinin Azərbaycan vətəndaşlarına verdiyi uzunmüddətli (90 gündən çox) vizaların sayı artır. Bu barədə bugünki mətbuat konfransında konsul Yosef Boqaç bildirib.

2014-cü ildə cəmi 50 uzunmüddətli viza verilmişdisə, 2015-ci ildə iki dəfə çox - 100 viza verilib. 2016-cı ildə 160 Azərbaycan vətəndaşı uzunmüddətli viza alıb.

2017-ci ildə bu günə qədər 120 viza verilib.

Uzunmüddətli vizaları əsasən təhsil üçün alırlar.

Eyni zamanda, verilən qısamüddətli Şengen vizalarının sayı azalıb.

Belə ki, 2014-cü ildə 8 min Şengen vizası, 2015-ci ildə 8230, 2016-cı ildə 6,5 min, 2017-ci ildə 5 min viza verilib. Konsul bunu Azərbaycan əhalisinin iqtisadi vəziyyətinin pisləşməsi və bu səbəbdən xaricə getmək istəyənlərin sayının azalması ilə izah edib.

Statistika açıqlamayan konsul Azərbaycana çox az vətəndaşın gəldiyini qeyd edib.

"Bu, daha çox Azərbaycanın turizm marketinqi məsələsidir, xaricdə ölkənin daha çox tanınması üçün daha çox şey edilməlidir", deyə Boqaç qeyd edib.

Amma səfirliyin digər nümayəndəsi qeyd edib ki, Çexiya turistləri tədricən Azərbaycana gəlməyə başlayır və onları ən çox ölkənin dağlarının gözəlliyi maraqlandırır.

İki ölkə arasında müntəzəm birbaşa hava əlaqəsinin bərpa edilməsinin nəzərdə tutulub-tutulmadığı və buna nəyin mane olduğu barədə suala cavabda Çexiya səfiri bildirib ki, bu, daha çox uçuşların ticari cəhətdən məqsədəuyğunluğunu qiymətləndirən şirkətlərə ünvanlanacaq sualdır.

Hazırda Azərbaycan turistləri Praqaya İstanbul, Kiyev və Moskvadan uçurlar.

Səfir turistlərin sayının artdığı yay mövsümündə birbaşa reyslərin açıla biləcəyini qeyd edib. -06D-