Ceyhun Bayramov ABŞ dövlət katibinin köməkçisi vəzifəsini icra edənlə telefon danışığı aparıb

Bakı/10.08.23/Turan: Ötən gün Azərbaycanın xarici işlər naziri Ceyhun Bayramov ABŞ dövlət katibinin Avropa və Avrasiya məsələləri üzrə köməkçisi vəzifəsini icra edən Yuri Kim ilə telefon danışığı aparıb.

Telefon danışığı zamanı tərəflər Azərbaycan və ABŞ arasında ikitərəfli əməkdaşlıq gündəliyi, Azərbaycanla Ermənistan arasında normallaşma prosesindən irəli gələn məsələləri və bölgədə vəziyyəti müzakirə edib, - deyə  Azərbaycan Xarici İşlər Nazirliyinin mətbuat xidməti bildirir. 

Ceyhun Bayramov Ermənistanın bölgədə qəsdən vəziyyəti gərginləşdirdiyi, müxtəlif bəhanələrlə, habelə bölgədə “blokada” və “humanitar böhran” kimi iddialar yaymaqla sülh prosesinə maneçilik törətdiyini bildirib.

Bununla yanaşı, Azərbaycanın ərazi bütövlüyü və suverenliyinə qarşı davam edən iddialarının, Azərbaycan ərazilərindən hələ də tam olaraq erməni silahlı qüvvələrini çıxarmaqdan imtina etməsinin və ölkəmizin daxili işlərinə qarışmasının qəbuledilməz olduğunu vurğulayıb.

"Ermənistan Azərbaycanın öz suveren ərazilərində yaratdığı "Laçın" sərhəd buraxılış məntəqəsinə qarşı təxribatları davam etdirsə də, Azərbaycan  erməni sakinlərin hər iki istiqamətdə keçidi üçün şərait yaradır, deyə Bayramov bildirib. 

Azərbaycan erməni əhalisinin ehtiyaclarını ödəmək üçün Ağdam-Xankiyəndi yolundan və digər alternativ yollardan istifadə etməyi təklif edib, lakin Ermənistan tərəfinin bu marşrutla daşımalara mane olur. Bu isə bir daha sübut edir ki, “blokada” və “humanitar böhran” barədə bəyanatlar “siyasi manipulyasiyalardır”, - deyə Bayramov qeyd edib. 06B