Co Bayden Trampı Qarabağ münaqişəsinə qarşı etinasızlığına görə tənqid edir

Bakı/14.10.20/Turan: Demokrat Partiyasından ABŞ prezidentliyinə namizəd Co Bayden Dağlıq Qarabağda döyüş əməliyyatları ilə bağlı bəyanat verib.

“Oktyabrın 10-da əldə olunmuş atəşkəs razılaşmasının iflası, döyüşlərin bərpası məni çox narahat edir. PUA-lardan, minaatanlardan və uzaq radiuslu artilleriya qurğularından istifadə cəbhənin hər iki tərəfində yüzlərlə insanın ölümünə və minlərlə dinc sakinin evlərini məcburi tərk etməsinə səbəb olur”, deyə Bayden bildirib.

Bayden gərginliyin başladığı andan etibarən Donald Tramp administrasiyasının passivliyinə və münaqişəyə müdaxilə etməməsinə diqqət çəkir.

“Sentyabrın 27-də döyüş əməliyyatları başladıqdan etibarən nə prezident Tramp, nə dövlət katibi Pompeo bir dəfə belə Azərbaycan və Ermənistan liderlərinə zəng etməyib.

Diplomatiyanı Moskvaya güzəştə getmək yerinə, Vaşinqton Avropalı tərəfdaşları ilə tərəfləri danışıqlar masası arxasına əyləşdirmək üzərində işləməlidir”, Bayden belə hesab edir.

“Tramp Administrasiyası Azərbaycana deməlidir ki, münaqişənin həlli yolla həll etmək cəhdlərinə dözümlü yanaşmayacaq. Eyni zamanda, Ermənistana bildirilməlidir ki, Dağlıq Qarabağ ətrafındakı rayonlar həmişəlik işğal altında qala bilməz və münaqişənin birdəfəlik həlli üzrə etibarlı danışıqlar atəşkəs əldə edildikdən dərhal sonra başlamalıdır.

Nəhayət, Ankaranın nazının çəkilməsinə son qoyulmalı, həm Türkiyə, həm də İran münaqişədən kənar durmağa çağırılmalıdır”, deyə Bayden bildirir.

“Diplomatik həllə nail olmaq çətin olacaq, amma Tramp administrasiyası buna nail olmağa çalışmalıdır. Nə qədər ki, münaqişə genişlənməyib və daha çox insan həlak olmayıb, bu, təcili edilməlidir”, deyə Bayden bəyan edib. -16D-