“Çovdarovu azad edib, siyasi məhbusları həbsdə saxlamaq ədalətsizlikdir”

Bakı/06.04.20/Turan: Keçmiş MTN generalları Akif Çovdarov və Subahir Qurbanovun əfv edilməsi vətəndaş cəmiyyəti və müxalifət nümayəndələrinin tənqidinə səbəb olub. 

Siyasi məhbusların vahid siyahısının hazırlanması üzrə İşçi Qrupunun üzvü Xədicə İsmayılova Turan-ın müxbiri ilə söhbətində bildirib ki, əfv olunanlar arasında siyasi məhbus kimi tanıdıqları iki nəfər var. Onlar İslam Partiyasının üzvü Fərahim Abbasov və Nardaran hadisələri ilə bağlı həbs olunmuş Eldar Binyadovdur (Bünyadov).

“Bu sənəd əslində siyasi məhbus probleminin həllinə yönəlməyib. Sənəddə deyilir ki, yaşla və koronavirusla bağlıdır. Amma siyahıda bir tanış ad var. O, siyasi məhbus deyil, uzun müddət siyasi repressiyaların aparıcı adamı olan Akif Çovdarovdur. Təsəvvür edin, Akif Çovdarov azadlığa buraxılır, amma siyasi məhbuslar azadlığa buraxılmır. Başa düşürəm, bu, humanitar addımdır, yaşla bağlı risk qrupuna aid olanlara yönəldilib. Amma Akif  Çovdarovu cəmiyyətdən təcrid etmək lazımdır. Çovdarov o qədər çox ciddi cinayətlərə imza atıb ki, onun azadlığa buraxılması cəmiyyət üçün ciddi mesajdır, həm də cəmiyyət üçün təhlükəli adamdır”,  X.İsmayılova qeyd edib.

Demokratik Qüvvələrin Milli Şurasının sədri Cəmil Həsənli keçmiş Milli Təhlükəsizlik Nazirliynin idarə rəislərinin əfv edilməsini kəskin tənqidlə qarşılayıb.

“Dövlətin və millətin təhlükəsizliyinə böyük zərbə vurmuş, MTN - də  korrupsiyanın  şəbəkələşməsində mühüm rol oynamış, hər ay keçmiş Rabitə və İnformasiya Texnologiyaları Nazıirliyindən böyük həcmdə paket almış Akif Çovdarov və Sübahir Qurbanovu əfv edilib, heç bir günahı olmayan Qarabağ qazisi Babək Həsənli, ölkənin müdafiəsində fədakarlıq etmiş Saleh Rüstəmli həbsdə saxlanılır, Qarabağ döyüşçüsü Tofiq Yaqublu həbsə göndərilir”, -  o, Facebook səhifəsində yazıb. 

Azərbaycan Xalq Cəbhəsi Partiyasının sədri Əli Kərimli Tofiq Yaqublu, Saleh Rüstəmli, Babək Həsənov kimi Qarabağ qazilərini, bütövlükdə haqq sözünə  görə  məhbəslərdəçürüdülən  130  nəfərdən artıq siyasi məhbusu həbsdə saxlayıb, MTN işinin əsas fiquru Akif Çovdarovu əfv etməyi haqsızlıq hesab edir.

“Əfv edilmiş 176 nəfərin mütləq əksəriyyətinin azadlığa çıxmasına sevinirik. Lakin siyasi məhbusları həbsdə saxlamaq doğru deyil. Hər fürsətdə  milləti  özününkilərə  və özgələrə (hətta düşmənlərə) bölmək çox səhv siyasətdir. İlham Əliyevin özü üçün də, bütövlükdə dövlət üçün də zərərlidir. Fəsadları ağır ola bilər. Bu siyasətdən imtina edilməli, siyasi məhbuslar və digər məhbusların da əksəriyyəti azad edilməlidir”, - Ə.Kərimli  Facebook səhifəsindəyazıb.

Müsavat Partiyasının sədri Arif Hacılı hesab edir ki, keçmiş MTN generallarının azadlığa buraxılması cəmiyyətə meydan oxumaqdır.

“Bu gün verilən əfv fərmanı çox məyusluqla qarşılanıb. Uzun müddət idi ki, əfv fərmanı verilməmişdi. Çoxsaylı siyasi məhbusların olduğu, həm də epidemiyanın hər gün daha çox yayıldığı indiki dövrdə belə əfv fərmanı vermək olmazdı. Bu fərman minlərlə məhbusa aid olmalı və ya hansı yollasa çoxlu sayda məhbusun azadlığa çıxması təmin edilməli idi. Türkiyədə, İranda, başqa ölkələrdə on minlərlə məhbus azadlığa buraxılır. Bu yolla indiki şəraitdə cəmiyyətdə gərginliyin azalmasına yönələn xoş məram nümayiş etdirilir. Azərbaycanda da belə addım atılmasını, siyasi məhbusların və minlərlə başqa məhbusun azadlığa buraxılmasını təklif etmişdik. Təəssüf ki, hakimiyyət yenə də cəmiyyətin maraqlarını nəzərə almadı, bizim təkliflərimizi qəbul etmədi. Tofiq Yaqublu, Babək Həsənov kimi siyasi məhbusları həbsdə saxlayıb, Akif Çovdarov kimi qatı cinayətkarların azadlığa buraxılması cəmiyyətə meydan oxumaqdır”, -  Müsavat Partiyasının lideri Turan-a bildirib.

Vaxtilə jurnalist Eynulla Fətullayev həbsxanada olarkən bildirmişdi ki, A.Çovdarov onu da “Monitor” jurnalının baş redaktoru, 2005-ci ildə qətlə yetirilmiş Elmar Hüseynovun başına gələnlər ilə hədələmişdi. 

Vəkil Elçin Sadıqov da E.Fətullayevi və jurnalist Aqil Xəlili müdafiə edərkən A.Çovdarov tərəfindən təhdidlərə məruz qaldığını mediaya bildirmişdi.-03B06-