COVİD-19 dərmanlarının yalnız imtiyazlı xəstələrə verilməsi haqqında bəyanatlar yalandır

Bakı/03.12.20/Turan: Azərbaycanda koronavirusa gündəlik yoluxma sayı elə bir göstəriciyə çatıb ki, sağlam insanlar da Covid-18-a yoluxma qorxusuyla virus əleyhinə dərmanlar alır. Bu, defisitə səbəb olur, apteklərdən bu qrupa daxil olan məşhur dərmanları (ergoferon və s.) tapmaq qeyri-mümkün olur. Yüksək tələbə müvafiq olaraq bu dərmanların qiyməti də artır. Həkim Oqtay Hüseynovun Turan-a verdiyi məlumata görə, virus əleyhinə preparatlar qrupunun qiyməti 500 manata çatır. Bu, hamının cibinə uyğun deyil.

“Covid-19 diaqnozu qoyulmuş xəstələr aptekə müraciət etdikdə bütün zəruri preparatları (virus əleyhinə, dezaqreqantlar...) mütləq qaydada ayrıca bir paketdə əldə etməlidir. Qiymət qəti müəyyən edilmiş və imtiyazlı olmalıdır”, deyə O.Hüseynov bildirib.

Həkim Adil Qeybulla KİV-ə bildirib ki, koronavirus dərmanı yoxdur. Müalicə spesifik deyil, bütün virus xəstəlikləri üçün ümumidir: orqanizmin immun sisteminin möhkəmləndirilməsi, yataq rejimi, maye qəbulu, həkimlər qızdırma salan preparatlar, parasetamol, tameflyu, antibiotiklər və s. yazır.

Səhiyyə Nazirliyinin mətbuat xidmətinin işçisi Turan-la söhbətində pulsuz dərman verilməsi nəzərdə tutulan imtiyazlı əhali qruplarının mövcudluğu haqqında gəzən fikri təsdiq etməyib. Onun sözlərinə görə, poliklinikalarda sahə həkimlər koronavirus simptomları olan xəstələrə vitamin kompleksi paketini (maqnezium, C vitamini, D3 vitamini, sink, selen, parasetamol) pulsuz verir. Bu preparatlardan koronavirusun müalicəsi və ağırlaşmasının qarşısının alınması üçün istifadə olunur.

Səhiyyə Nazirliyi apteklərdə dərmanların qiymətlərini müəyyən etmir və onlara nəzarət etmir, bu, Nazirlər Kabineti yanında Tarif Şurasının səlahiyyətinə aiddir. Koronavirus pandemiyasının sonuncu dəfə yayılması ilə əlaqədar Tarif Şurası qərar qəbul etməyib. TŞ-nin fəaliyyəti haqqında son xəbər 19 iyun 2020-ci ilə aiddir.

“Dövlət stasionarlarda müalicə alan xəstələri də pulsuz dərmanlarla təmin edir”, deyə Səhiyyə Nazirliyindən bildiriblər.

Səhiyyə Nazirliyində Azərbaycan əhalisinə pulsuz peyvənd vurulması mümkünlüyü haqqında məlumat yoxdur. Türkiyədə və Rusiyada bütün ölkə əhalisinə pulsuz koronavirus peyvəndi vurulması qərarı qəbul edilib. Rusiyada pulsuz peyvənd vurulmasına başlanılıb.

Fevralın 27-də yaradılmış Nazirlər Kabineti yanında Operativ Qərargah koronavirusun ikinci dalğasına yalnız xəstəliyə yoluxanların, sağalanları və ölənlərin sayı haqqında məlumatlarla reaksiya verir. Qərargahın ilk günlərdə göstərdiyi fəallıq bu gün müşahidə olunmur, sanki belə bir qərargah heç yoxdur. -0-