Daha 13 erməni hərbiçi 6 il azadlıqdan məhrumetmə cəzasına məhkum edilib

Bakı/23.07.21/Turan: İyulun 23-də Bakı Ağır Cinayətlər Məhkəməsində 13 nəfər erməni hərbiçisindən ibarət üçüncü qrupun işi üzrə proses başa çatıb.

Dövlət ittihamçısı onların hər birinin sərhədi qanunsuz keçməkdə və qanunsuz silah saxlamaqda təqsirli bilinərək, 7 il müddətinə azadlıqdan məhrum edilməsini istəyib. Prokuror eyni zamanda ittihamdan terrorçuluq və qanunsuz birləşmə yaratmaq maddələrinin çıxarılmasını istəyib.

Müşavirədən sonra hakim Azad Məcidov hökmü oxuyub, Ermənistan vətəndaşları Karapetyan Rafik, Qoloyan Qurqen, Tadevosyan Qrayr, Maloyan Vaqarşak, Yeqiazaryan Sasun, Vardanyan Arsen, Baxrikyan Vahagen, Soqomonyan Setrak, Dilanyan Armen, Martonyan Manuk, Anbardanyan Melsa, Mikaelyan Andranik və Qriqoryan Feliksi təqsirli bilib və onları 6 il müddətinə azadlıqdan məhrumetmə cəzasına məhkum edib.

Xatırladaq ki, adı çəkilən şəxslər erməni ordusunun 2020-ci il dekabrın 13-də Azərbaycan Dövlət Təhlükəsizliyi Xidmətinin əməliyyatı zamanı Hadrut ərazisində əsir götürülmüş hərbiçiləridir. Ümumilikdə 60-dan çox hərbiçi saxlanılıb. Sonradan bir neçə nəfər azad edilib.

İyunda 15 nəfərlik qrup Ağdamda minalanmış ərazilərin xəritələri müqabilində Ermənistana təhvil verilib.

Qalan şəxslər 13-14 nəfərlik üç qrupa bölünüblər və məhkəmə qarşısına çıxarılıblar. Birinci qrup şərti cəzaya məhkum edilib və Füzuli və Zəngilanda minalanmış ərazilərin xəritələri ilə dəyişdirilib.

Dünən 13 nəfər erməni hərbiçisindən ibarət qrup 6 il real azadlıqdan məhrumetmə cəzasına məhkum edilib. -02D-