David Şahnazaryan: “Cenevrədə ermənilərin və azərbaycanlıların Qarabağda birgə yaşaması məsələsi müzakirə edilib”

Bakı/31.01.20/Turan: Ermənistan Milli Təhlükəsizlik Xidmətinin keçmiş rəhbəri David Şahnazaryan 168.am-a verdiyi müsahibədə Cenevrədə Azərbaycan və Ermənistan XİN rəhbərləri arasında danışıqların məzmunu barədə sensasion bəyanat verib.

“Əsas məsələlərdən biri Dağlıq Qarabağda ermənilərin və azərbaycanlıların birgə məskunlaşması üçün zonaların yaradılmasıdır. İlk növbədə Şuşa məsələsi, həmçinin məzmunlu danışıqların intensivləşməsi müzakirə olunur. Məhz bu kontekstdə Cenevrədəki danışıqlara paralel olaraq ABŞ-ın Bakıdakı səfiri Erl Litzenberger öz təşəbbüsü ilə Dağlıq Qarabağın azərbaycanlı icmasının rəhbəri Tural Gəncəliyevlə görüşüb”, -Şahnazaryan qeyd edib.

Öz növbəsində Ermənistan XİN mətbuat katibi Anna Naqdalyan Şahnazaryanın bəyanatını təkzib etməyə tələsərək deyib: “David Şahnazaryanın təhlilləri Azərbaycan tərəfi və ya onu əhatə edən dairələr üçün cəlbedici ola bilər, lakin bu təhlildə əsas çatışmazlıq ondan ibarətdir ki, bunun bugünkü reallıqla heç bir əlaqəsi yoxdur”. -02D-