Deputat Tarif Şurasının ləğv edilməsini istəyir

Bakı/01.02.21/Turan: Tarif Şurasının içməli və çirkab sularının qiymətini artırması Milli Məclisin bir sıra deputatları tərəfindən tənqidlə qarşılanıb. 

“Azərbaycanın başının üstündə bir kabus əmələ gəlib, o da Tarif Şurasıdır. Heç kim bilmir ki, orada kimlər var”. Bu barədə Milli Məclisin fevrlaın 1-də keçirilən plenar iclasında deputat Tahir Kərimli bildirib.

Deputatın sözlərinə görə, Tarif Şurası qiymətləri qaldırır, heç kim camaatın qarşısına çıxıb izahat vermir.

“Mənə elə gəlir ki, təcili olaraq Tarif  Şurasını ləğv etməliyik. Biz bilmirik ki, nə vaxt bahalaşma olacaq. Prezidentin gördüyü işə bu qədər kölgə salmaq lazım deyil”, deyə deputat Kərimli qeyd edib.

Deputat Sabir Rüstəmxanlı Tarif Şurasının üzvlərinin Milli Məclisə dəvət edilməsini tələb edib. Onun sözlərinə görə, Tarif Şurası benzinin qiymətini artırdıqdan bir neçə gün sonra suyun qiymətini 2 dəfə artırıb.

“Bu qurum hansı əsaslarla bu qərarların verildiyini bizə bildirməlidir. Bununla bağlı dinləmələr keçirməliyik”, deyə deputat bildirib.

Tarif Şurası 2005-ci ilin dekabrında yaradılıb. Tarif (qiymət) Şurası dövlət tənzimlənməsi tətbiq edilən qiymətlərin (tariflərin), xidmət haqlarının, yığımların dövlət tənzimlənməsini həyata keçirən kollegial icra hakimiyyəti orqanıdır.-0-