Dinc qonşuluq təşəbbüsü Gürcüstan baş nazirinin Bakıda apardığı danışıqların əsas mövzusudur

Bakı/29.09.21/Turan: Bu gün Bakıya səfərə gələn Gürcüstan baş naziri ikitərəfli hökumətlərarası iqtisadi komissiyanın iclasında iştirak edəcək. Amma İrakli Qaribaşvilinin səfərinin əsas məqsədi Azərbaycan prezidenti İlham Əliyevlə görüşdür.

Gürcüstanın hökumət başçısı səfərdən əvvəl bildirib ki, Bakıya səfəri zamanı əsas müzakirə mövzusu “Dinc qonşuluq təşəbbüsü” olacaq. Bundan başqa, baş nazirin sözlərinə görə, o, yaxın günlərdə Yerevana getməyi planlaşdırır, orada da eyni məsələni Ermənistan baş naziri Nikol Paşinyanla müzakirə edəcək.

Xatırladaq ki, Nyu Yorkda BMT Baş Assambleyasının 76-cı sessiyasında çıxış edən Qaribaşvili Qaradəniz regionunda sülh və sabitliyi təmin etmək üçün “Dinc qonşuluq təşəbbüsü” yaratmağı təklif edib. O, Qərb tərəfdaşlarının da iştirakı ilə Tbilisidə Bakı və Yerevan arasında yüksək səviyyəli danlışıqlar üçün platforma yaradılmasını nəzərdə tutur.

Bu təşəbbüsün digər parametrləri haqqında heç nə məlum deyil. İştirakçıların təklif edilən tərkibindən göründüyü qədər Qaribaşvilinin təşəbbüsü Türkiyə prezidentinin 3+3 (üç Cənubi Qafqaz ölkəsi, Türkiyə, Rusiya, İran) Qafqaz Platforması yaratmaq ideyasının alternatividir.

Erdoğanın ideyasından fərqli olaraq, Qaribaşvilinin təşəbbüsü açıq-aşkar Qərbyönlü xarakter daşıyır. Göründüyü qədər, o, Avropa İttifaqının, həmçinin ABŞ-ın şəxsində kollektiv Qərbin iştirakını nəzərdə tutur.

Hazırki siyasi konyunkturada Bakı və Yerevanın Moskva və Ankaranın iştirakını istisna edən formata razılıq verəcəyini ehtimal etmək çox çətindir. -02B-