"Diqlas" Ticarət Mərkəzində yanğından zərər çəkənlərə ilkin təzminat 3 mln. manat təşkil edib

Bakı/29.03.19/Turan: Azərbaycan prezidenti İlham Əliyev martın 26-da "Diqlas" ticarət mərkəzində yanğından ziyan çəkən sahibkarlara ilkin olaraq 3 milyon manat ayrılması barədə sərəncam imzalayıb. Vəsait Prezidentin Ehtiyat Fondundan ayrılacaq.

Bu arada, cümə günü zərərçəkmişlərlə görüşdə iqtisadiyyat nazirinin müavini Niyazi Səfərov bildirib ki, təzminat "Kapital Bank" vasitəilə ödəniləcək, burada adlı hesablar açılacaq.

Onun sözlərinə görə, təzminatlar iki mərhələdə ödəniləcək: birinci mərhələdə hesaba müəyyən məbləğ ödəniləcək, ziyan müəyyən edildikdən sonra zərərçəkmişlər təzminatın qalan hissəsini alacaqlar.

Öz növbəsində, iqtisadiyyat naziri Şahin Mustafayev jurnalistlərlə söhbətində bildirib ki, yanğın 171 ticarət obyektinə ziyan vurub. O, həmçinin qeyd edib ki, bir sıra ticarət mərkəzlərinin rəhbərləri zərər çəkmiş sahibkarlara 4-5 aylıq pulsuz ticarət sahəsi verməyə hazırdırlar.

Xatırladaq ki, martın 26-da baş verən yanğın paytaxtın Nizami rayonundakı böyük "Diqlas" ticarət mərkəzinə on milyonlarla manat ziyan vurub (qeyri-rəsmi məlumat). Bu məbləğin içində ticarət mərkəzinin özünə dəyən ziyan deyil, yalnız yer icarəyə götürən sahibkarların yanan malları nəzərə alınır. -71D-