Dmanisidə vəziyyət stabilləşib

Bakı/18.05.21/Turan: Hazırda Gürcüstanın Dmanisi rayon mərkəzində vəziyyət stabildir, amma orada  vəziyyətə nəzarət edən əlavə polis qüvvələri qalmaqdadır. Bu barədə “Sputnik-Gruziya” Gürcüstan Xarici İşlər Nazirliyinə istinadla məlumat verib

Dmanisidə etnik azərbaycanlılar və Svanetiyadan olan eko-miqrantlar arasında kütləvi qarşıdurma bir günə yaxın davam edib. Yerli və mərkəzi hakimiyyətin, habelə ruhanilərin nümayəndələrinin müdaxiləsi ilə tərəflər arasında barışığa nail olmaq mümkün olub. İşlə bağlı istintaq başlayıb. İnsident iştirakçılarının dindirilməsi davam etdirilir.

Xarici işlər naziri Vaxtanq Qomelaurinin sözlərinə görə, xəsarət alanlar var, amma nə polislər, nə də insident iştirakçıları arasında ağır yaralanma yoxdur. Qeyri-rəsmi məlumatlara görə, 8 nəfər saxlanılıb.

Nazirlik hadisənin bitməsini alqışlayır və etnik mənsubiyyətindən asılı olmayaraq, Gürcüstan vətəndaşlarının ölkədə dinc mühitin qorunmasında məsuliyyətlərini dərk etdiklərinə ümid etdiyini bildirir.

Şərqi Gürcüstan müftisi Etibar Eminov qarşıdurma tərəfləri ilə görüşdən sonra onların barışığa nail olduqlarını və münaqişənin davam etməyəcəyini qeyd edib.

Dmanisidə iğtişaşlar bazar günü axşam başlayıb. Dmanisidə yaşayan etnik azərbaycanlılar və Svanidzedən olan eko-miqrantlar arasında münaqişə dəyənək və daşlardan istifadə ilə qanlı döyüşə çevrilib. Münaqişəyə svanların onlara pulsuz pivə verilməsini tələb etməsi səbəb olub. Azərbaycanlı mağaza sahibinin etirazından sonra svanlar ona hücum ediblər və mağazanı talan ediblər. -02В-