Donald Tramp komandasının Azərbaycan və Ermənistan XİN başçıları ilə bazar günü keçirdiyi görüşlərə dair

Vaşinqton/26.10.20/ Turan: Tramp Administrasiyası “bütün həftə sonunu” Ermənistan və Azərbaycan arasında sülhə nail olmağa çalışmaqla keçirib, bu barədə bazar günü ABŞ administrasiyasının yüksək vəzifəli nümayəndəsi Turan-ın Vaşinqtondakı müxbirinə bildirib.

Cümə günü Azərbaycan və Ermənistan xarici işlər nazirlərinin Dövlət Departamentində və Ağ Evdə keçirdikləri görüşlərdən sonra prezident Trampın milli təhlükəsizlik üzrə müşaviri Robert O’Brayen şənbə günü prezident İlham Əliyev və Ermənistanın baş naziri Nikol Paşinyanla telefonla danışıb.

Öz növbəsində, dövlət katibinin müavini Stiven Biqun şənbə günü xarici işlər nazirləri Zograb Mnatsakanyan və Ceyhun Bayramovla, habelə Minsk Qrupunun həmsədrləri və ATƏT nümayəndəsi Andjey Kasprşiklə görüşüb.

Bazar günü Dövlət Departamentdində elan olunan üçüncü atəşkəs “bazar günü son dəqiqədə” razılaşdırılıb, deyə diplomatik mənbə Turan-a bildirib. 

“Ötən həftə sonu Vaşinqton, Bakı və Yerevan arasında dəhşətli qarşıdurma olub”, deyə mənbə bildirib. 

Bazar günü Dövlət Departamentinin elanından sonra Tramp Tvitterdə “indicə gecə yarısından etibarən atəşkəs rejiminə riayət etməyə razılaşan” prezident Əliyevi və baş nazir Paşinyanı təbrik edib.

“Çox sayda həyat xilas olacağını” yazan Tramp Pompeo, Biqan, Ağ Evin Milli Təhlükəsizlik Şurası da daxil olmaqla, “sövdələşməni yerinə yetirdiklərinə görə komandası ilə qürur duyduğunu” əlavə edib.

“Bu gün əldə edilmiş atəşkəsə riayət etmək razılığına görə onların hamısını təbrik edirəm, - deyə öz növbəsində O’Brayen Tvitterdə yazıb. – Hər iki ölkədə həyatlar xilas olub. Əsas rolu Katib Pompeo və dövlət katibinin müavini Stiven Bigan oynayıblar. Afərin”, deyə o əlavə edib. 

ATƏT-in Minsk Qrupu öz bəyanatında bildirib ki, qrupun həmsədrləri - Rusiya Federasiyasından İqor Popov, Fransadan Stefan Viskonti və ABŞ-dan Andryu Şofer Ermənistan və Azərbaycan xarici işlər nazirlər ilə atəşkəsin müşahidə edilməsi parametrlərinin və uzunmuddətli hərtərəfli qərarın qəbul edilməsi müddətlərinin müzakirə edilməsi üçün oktyabrın 29-da Cenevrədə yenidən görüşmək barədə razılığa gəliblər. 

Atəşkəsin şərtləri haqqında heç bir əlavə məlumat daxil olmayıb. -25B-