Dövlət Departamenti: Ermənistandakı hərbi təlimlər ABŞ-ın Qarabağda vasitəçiliyinə təsir etmir

Vaşinqton/12.09.23/Turan: Bazar ertəsi ABŞ bildirib ki, Ermənistanda keçirilən birgə hərbi təlimlərlə əlaqədar    Azərbaycanla Ermənistan arasında özünün vasitəçiliyində "heç bir fəsad" görmür, Turan-ın Vaşinqton müxbiri bildirib.

"Biz burada hər hansı fəsad görmürük", - Dövlət Departamentinin yüksək vəzifəli məmurları jurnalistlərə bildiriblər.

«Eagle-Partner 2023» adlı təlimlərdə 175 erməni və 85 amerikalı əsgər iştirak edir. Təlimlərdə məqsəd Ermənistanın 12-ci sülhməramlı briqadasını NATO standartlarına uyğunlaşdırmaqdır.

Dövlət Departamentinin nümayəndəsi Metyü Miller bu təlimlərin Ermənistanda keçirilməsinə görə Rusiyanın narazılığı ilə bağlı Turan-ın sualına cavabında deyib: "Rusiyanın özünün iki qonşusunun ərazisini işğal etdiyini nəzərə alsaq, o, region ölkələrinə təhlükəsizlik haqqında mühazirə oxumamalıdır".

Miller həmçinin deyib ki, hərbi təlimlər hər hansı konkret hadisəyə cavab olaraq yox, "bizim silahlı qüvvələrimiz arasında hazırlığı və əməliyyat uyğunluğunu dəstəkləməyə” yönəlmiş təlim çərçivəsində həyata keçirilir.

“Ermənistan ABŞ-ın çoxdankı tərəfdaşıdır və 2003-cü ildən Müdafiə Nazirliyinin dövlət tərəfdaşlığı proqramı çərçivəsində Kanzas Milli Qvardiyası ilə möhkəm əlaqələr qurub. Odur ki, bunlar adi təlimlərdir və hər hansı digər  tədbirlərlə əlaqəli deyil", - o deyib. 0