Dövlət Departamenti: Kreml məmurları ukraynalıların "filtrasiya" prosesinə nəzarət edirlər

Vaşinqton/01.09.22/Turan: Rusiya prezident administrasiyasının əməkdaşları Ukraynadan olan mülki şəxslərin və hərbi əsirlərin filtrasiyasına nəzarət və koordinasiya edirlər. Onlar saxlanılır, dindirilir, bəzən də zorla Rusiyaya deportasiya edilirlər. Bu barədə ABŞ-ın yüksək vəzifəli məmurları və ekspertlər Dövlət Departamentinin Brüssel KİV Mərkəzində brifinq zamanı  bildiriblər.

 “Biz həmçinin bilirik ki, Rusiya Ukrayna vətəndaşları haqqında məlumat toplamaq üçün filtrasiya zamanı  qabaqcıl texnologiyadan istifadə edir”, - Dövlət Departamenti Qlobal Cinayət Ədliyyəsi İdarəsinin baş eksperti doktor Emma Gilliqan deyib.

Kreml və onun Ukraynadakı separatçı müttəfiqləri müharibə başlayandan  yüz minlərlə ukraynalını zorla Rusiyaya göndəriblər. Həmin adamların çoxu cəza filtrasiya sistemindən keçib.

Ötən həftə Yale Universitetinin açıqladığı hesabata görə, Ukraynanın şərqində Donetsk vilayətində 21 filtrasiya düşərgəsi yaradılıb.

Ukraynanın  digər vilayətlərində də oxşar filtrasiya həyata keçirilir”, - Yale Universiteti Humanitar Araşdırmalar Laboratoriyasının icraçı direktoru Nataniel Raymond deyib.

Dövlət Departamenti katibinin münaqişələr üzrə köməkçisinin müavini Metyu Steynhelferin sözlərinə görə, adamların məcburi deportasiyası “Dördüncü Cenevrə Konvensiyasının ciddi şəkildə pozulmasıdır və hərbi cinayət sayılır”.

ABŞ tərəfindən bu cür hərbi cinayətlərin araşdırılması ilə bağlı Turan-ın sualının  cavabında doktor Gilliqan deyib: “Biz Ukraynadakı vəhşiliklərlə bağlı Beynəlxalq Cinayət Məhkəməsinin araşdırmasını dəstəkləyirik”. 0