Dövlət Təhlükəsizliyi Xidmətinin nümayəndələri beynəlxalq təşkilatlarda rəsmən təmsil olunacaqlar

Bakı/28.12.22/Turan: Dekabrın 28-də dövlət başçısı Azərbaycan Dövlət Təhlükəsizliyi Xidmətilə beynəlxalq təşkilatlar, xarici dövlətlərin xüsusi xidmət orqanları və hüquq-mühafizə orqanları arasında əməkdaşlığın səmərəliliyinin artırılması haqda fərman imzalayıb.

Beynəlxalq terrorizm, transmilli mütəşəkkil cinayətkarlıq və kibercinayətkarlığa qarşı mübarizənin səmərəliliyini artırmaq üçün Dövlət Təhlükəsizliyi Xidmətinin rəhbərinə ölkə prezidentilə razılaşdırmaqla Dövlət Təhlükəsizliyi Xidmətinin digər ölkələrdə və beynəlxalq təşkilatlarda nümayəndələrini təyin etmək tapşırılıb.

Namizədlər dövlət başçısına təqdim edilmədən öncə Azərbaycan Xarici İşlər Nazirliyilə razılaşdırılmalıdır.

Dövlət Təhlükəsizliyi Xidmətinin xarici dövlətlərdə və beynəlxalq təşkilatlarda nümayəndələri Azərbaycanın diplomatik nümayəndəliklərində öz funksiyalarını yerinə yetirirlər. -02D-