DQMŞ prezident seçkilərində səslərin paralel sayılmasının və müstəqil exit-poll-un tərəfdarıdır

Demokratik Qüvvələrin Milli Şurası (DQMŞ) iyunun 7-də ilk iclasında dünya ictimaiyyətinə müraciət qəbul edib.

Müraciətdə DQMŞ-nin yaranmasının məqsədləri əks olunub və DQMŞ-nin Azərbaycanın demokratikləşməsi və insan hüquqlarının müdafiəsi üzrə səylərini dəstəkləmək çağırışı yer alır.

Bundan başqa, müraciətdə Azərbaycanda demokratik azadlıqların, o cümlədən toplaşmaq, ifadə, media azadlığının təmin edilməsinə yardımın, siyasi məhbusların azad edilməsinin əhəmiyyəti qeyd olunur.

Prezident seçkilərinin demokratikliyinin təmin edilməsi və düzgün, rəqabətli seçkiqabağı kampaniya formalaşdırılması zərurətinə xüsusi diqqət yetirilir. Həmçinin ATƏT DTİHB və AŞ Venesiya Komissiyasının tövsiyələri əsasında seçki qanunvericiliyinin təkmilləşdirilməsinin, səslərin paralel sayılmasının və müstəqil exit-poll təşkil edilməsinin əhəmiyyəti vurğulanır. -06D-