DRH ABŞ liderlərini Azərbaycana qarşı 907-ci düzəlişi ləğv etməyə çağırıb

Bakı/02.02.21/Turan: Azərbaycan Demokratiya və Rifah Hərəkatı (DRH) ABŞ liderlərinə müraciət edərək Azərbaycan qarşı ayrı-seçkilik edən "Azadlığa Dəstək" Aktına 907-ci düzəlişi ləğv etməyə çağırıb.

“1992-ci ildə erməni lobbisinin təşəbbüsü ilə ABŞ Konqresi tərəfindən "Azadlığa Dəstək" Aktına 907-ci düzəliş  qəbul edilib ki, bununla da Amerikanın  Azərbaycana birbaşa dövlət yardımı 2002-ci ilədək yasaqlanıb.  2001-ci il 11 sentyabr hadisələrindən sonra Azərbaycanın beynəlxalq terrorizmlə mübarizədə dəstəyini təmin etmək məqsədilə ABŞ Konqresi Prezidentə düzəlişin hüquqi qüvvəsini dayandırmaq səlahiyyəti verib. O vaxtdan indiyə qədər 20 ildir ki, ABŞ prezidentləri hər il 907-ci  düzəlişin təxirə salınması ilə bağlı qərar imzalayırlar”, -  DRH sədri Qubad İbadoğlunun ABŞ Prezidenti Cozef Baydenə, Senatın prezidenti Kamilla Harissə, Nümayəndələr Palatasının spikeri Nensi Pelosiyə və Dövlət Katibi Antoni Blinkenə müraciətində deyilir.

Sənədə əsasən, ABŞ prezidenti Azərbaycan hökumətinin Ermənistana və Dağlıq Qarabağa qarşı blokadasının və digər güc tətbiqin aradan qaldırılması üçün addımların atdığını müəyyən etsə və bu haqda Konqresə məruzə etsə, Azərbaycan hökumətinə ABŞ tərəfindən bu və ya digər qanunlarla nəzərdə tutulmuş yardım qadağası aradan qaldırıla bilər.

Prezident qadağanın tətbiq edilməsinin ABŞ-ın milli maraqlarına uyğun olmadığına dair qərara gəlsə və bu haqda Konqresə təqdimat versə, qadağa tətbiq edilməməlidir.

İbadoğlu müraciəti ünvanladığı şəxslərin diqqətinə çatdırır ki, ikinci Qarabağ müharibəsindən sonra Azərbaycan, Ermənistan və Rusiya dövlət və hökümət başçılarının imzaladığı 9 noyabr  2020-ci il  tarixli üçtərəfli sazişlə Cənubi Qafqaz regionunda, o cümlədən Ermənistana, Naxçıvana və Dağlıq Qarabağa münasibətdə bloklanan bütün kommunikasiya və nəqliyyat xətlərinin açılması razılaşdırılıb.

11 yanvar 2021-ci il tarixli üçtərəfli sazişlə  həmin razılaşmanın icrası  üçün Azərbaycan, Ermənistan və Rusiya  hökümət başçılarının müavinlərindən ibarət komissiya yaradılıb. Komissiyanın ilk iclası 30 yanvar 2011-ci ildə keçirilib. Tərəflər kommunikasiyaların açılması, nəqliyyat əlaqələrinin bərpasına  dair fəaliyyət planlarının işlənilməsinə start verib. Bu Fəaliyyət Planının  martın 1-dək qəbul olunması nəzərdə tutulub.

Bununla da Cənubi Qafqazda bütün nəqliyyat və kommunikasiya xətləri region  ölkələrinin məhdudiyyətsiz  istifadəsinə veriləcək.

Belə olan halda da  “Azadlığa dəstək aktı”na 907-ci düzəliş əhəmiyyətini itirir.

Bununla əlaqədar olaraq, İbadoğlu ABŞ prezidentini “Azadlıq aktı”na 907-ci düzəlişin ləğv edilməsi üçün ən qısa müddətdə Konqresə təqdimat verməyə çağırır.

“Əminik ki, sizin bu təşəbbüsünüz xalqlarımız arasında dostluq və mehribanlıq münasibətlərinin  möhkəmlənməsinə xidmət edəcək və Azərbaycanın işğaldan azad edilmiş rayonlarda bərpa və yenidənqurma işlərinin aparılmasına ABŞ-ın  dövlət mənşəli sərmayələrinin  cəlb edilməsi üçün vacib olan  hüquqi əsas yaradacaq”, - müraciətin sonunda deyilir.–06D-