"Dünya daha yaxşı gələcəyə aparacaq" - Blinken Azərbaycanı Müstəqillik Günü münasibətilə təbrik edib

Vaşinqton/28.05.23/Turan: “Amerika Birləşmiş Ştatları adından Azərbaycan xalqını Müstəqillik Günü münasibətilə təbrik edirəm”, - ABŞ-ın dövlət katibi Entoni Blinken bazar günü bəyanatında bildirib.

TURAN-ın Vaşinqtondakı müxbirinin xəbərnə görə, Blinken deyib: “Biz ümumi ikitərəfli prioritetlərimizin irəliləyişi üçün Azərbaycanla davamlı əməkdaşlığımızı yüksək qiymətləndiririk”.

“ABŞ-ın Azərbaycanla 31 illik sıx əməkdaşlığı təhlükəsizlik, enerji sahəsində və iqtisadi artımın ümumi maraqları üzərində qurulub.

Əməkdaşlığımız Azərbaycan konstitusiyasına uyğun olaraq demokratiyaya, insan hüquqlarına və əsas azadlıqlarına hörmətlə bağlı öhdəliyə əsaslanır”, - deyə dövlət katibi bildirib.

Blinken ABŞ-ın Azərbaycanın müstəqilliyinə və suverenliyinə dəstəyini bir daha təsdiqləyib və qeyd edib ki, o, yaxın illərdə ABŞ-Azərbaycan münasibətlərinin dərinləşməsinə “ümid edir”.

“Birləşmiş Ştatlar həm də Azərbaycana və regiona davamlı sülhün qurulmasına kömək etmək üçün davamlı əməkdaşlıq və əlaqəni səbirsizliklə gözləyir. Biz Cənubi Qafqazın bütün xalqları üçün daha yaxşı gələcəyə aparacaq bu məqsədi dəstəkləməyə tam sadiqik”, - deyə o, yekunlaşdırıb. -0-