Düşmən məqsədyönlü şəkildə və metodik olaraq mövqelərindən sıxışdırılır – Müdafiə Nazirliyi

Bakı/03.11.20/Turan: Ermənistan tərəfinin cəbhənin cənub sahəsində Azərbaycan Ordusunun guya əvvəlki mövqelərinə atıldığı barədə yaydığı məlumat qətiyyən həqiqətə uyğun deyil.

Azərbaycan Ordusu cəbhənin bütün sahələrində düşmən üzərində tam taktiki və atəş üstünlüyünə malikdir. Düşmən məqsədyönlü şəkildə və metodik olaraq mövqelərindən sıxışdırılır, bu barədə Azərbaycan Müdafiə Nazirliyinin noyabrın 3-də yaydığı məlumatda deyilir.

Müdafiə Nazirliyi həmçinin erməni tərəfinin Şuşa şəhərinə qadağan olunmuş döyüş sursatının atılması barədə yaydığı xəbərləri də təkzib edib.

Daha bir təkzib düşmənin guya cənub istiqamətində bölmələrimizin minaatan taqımını məhv edərək vacib sənədləri əldə etməsi barədə ermənilərin yaydığı məlumata aiddir. “Bu,  cəfəngiyatdan başqa bir şey deyil”, - deyə Müdafiə Nazirliyinin məlumatında bildirilir.

Eyni zamanda, Ermənistan Müdafiə Nazirliyinin nümayəndəsi bu gün erməni birləşmələrinin "taktiki məqsədlə" şərq istiqamətində bir sıra mövqelərindən çəkildiyini etiraf edib.

Eyni nümayəndə, ermənilərin Xocavənd rayonundakı böyük Çartar qəsəbəsi istiqamətində iki mövqe itirdiyini etiraf edib.

Ermənilər etiraf edirlər ki, bu ərazidəki hücumları çətinliklə saxlayırlar və metodik olaraq geri çəkilirlər. -02D-