Edvard Nalbandyan Azərbaycanı Qarabağ münaqişəsinin nizamlanmasını istəməməkdə ittiham edib

Bakı/21.11.17/Turan: "Azərbaycan əldə olunan razılaşmalardan kənara çəkilir və danışıqları əsas prinsiplər üzrə aparmaq istəmir. Məhz buna görə də Qarabağ nizamlanmasına nail olmaq mümkün deyil", - Ermənistan XİN rəhbəri Edvard Nalbandyan RF XİN rəhbəri Sergey Lavrov ilə birgə keçirdiyi mətbuat konfransında danışıqların nəticəsiz qalmasının səbəbləri barədə sualın cavabında deyib.

E.Nalbandyan Bakını 2011-ci ildən başlayaraq yüksək səviyyədə qəbul edilmiş razılaşmaları yerinə yetirməməkdə ittiham edib.

"Kazan, Soçi, Sankt-Peterburq, Vyana və digər yerlərdə konkret razılaşmaya nail olduq. Ancaq Bakıya döndükdən sonra Azərbaycan tərəfi öz sözlərindən imtina etdi", - o vurğulayıb.

O həmçinin erməni qoşunların işğal olunmuş ərazilərdən çıxarılması barədə BMT Təhlükəsizlik Şurasının 4 qətnaməsinin Ermənistan tərəfindən yerinə yetirilməməsi ilə bağlı Bakının ittihamlarını qəbul etməyib. "Qətnamələr hərbi əməliyyatların dayandırılması məqsədilə qəbil edilib, ancaq hər dəfə Bakı onların icrasını pozub", - bildirib.

Sonra E.Nalbandyan dekabrda Vyanada iki ölkə prezidentinin görüşü barədə razılığın olmasını inkar edib: "Hələlik belə razılıq yoxdur və bu görüşün keçirilməsi müzakirə olunmur".

Öz növbəsində S.Lavrov iki gün öncə Bakıda söylədiyi fikirləri təkrarlayıb: "Nizamlanmaya dair variantlar masanın üzərindədir. Onlar ümumi paketdədir, bir-birindən ayırmaq olmaz".

"Məndə böyük optimizm yoxdur, ancaq danışıqları davam etdirmək lazımdır", - S.Lavrov vurğulayıb.-02D-