Əfqanıstan üzrə Beynəlxalq Təmas Qrupu Bakıda toplaşır

Bakı/25.06.18/Turan: Iyunun 28-də Bakıda rəsmi Əfqanıstanla "Talıban Hərəkatı" arasında görüş olacağı barədə yayılan xəbərlər əsassızdır, həmin vaxt Bakıda Əfqanıstan üzrə Beynəlxalq Təmas Qrupunun toplantısı keçiriləcək. Bu barədə Azərbaycan Xarici İşlər Nazirliyi mətbuat xidmətinin rəhbəri Hikmət Hacıyev KİV-in sorğusuna cavab olaraq bildirib.

H.Hacıyevin sözlərinə görə ki, iyunun 28-də Bakıdakı toplantıya Beynəlxalq Təmas Qrupunda (BTQ) iştirak edən ölkələrin və beynəlxalq təşkilatların təqribən 90-na yaxın nümayəndəsi qatılacaq.

Onun sözlərinə görə, tədbirdə Əfqanıstanın dövlət və qeyri-hökumət təşkilatlarının nümayəndələrinin iştirakı gözlənilir.

"İyunun 28-də Bakıda Əfqanıstanla əlaqədar keçirilən tədbir budur. Azərbaycan Əfqanıstan ilə bağlı bir sıra beynəlxalq və regional formatlarda iştirak edir və bu ölkədə sülh, sabitlik və inkişafın təmin edilməsinə öz töhfəsini verir. 2017-ci il dekabrın 1-də Azərbaycanın Əfqanıstanla birlikdə həmsədrliyi çərçivəsində "Asiyanın ürəyi- İstanbul Prosesi"nin yeddinci nazirlər iclası da Bakıda keçirilib", - H.Haciyev bildirib.

Xatırladaq ki, BTQ 2009-cu ildə təsis edilib və Azərbaycan da daxil olmaqla 60 dövlət və beynəlxalq təşkilat bu qrupda təmsil olunur. BTQ Əfqanıstan və yerləşdiyi regionun inkişafına töhfə verilməsi üçün müzakirələrin aparılmasına xidmət edən platformadır. Əfqanıstanla birgə Almaniya da adı çəkilən qrupun həmsədridir. -05D-