Əliyev və Şoyqu regional məsələləri müzakirə ediblər

Bakı/25.08.20/Turan: Bu gün Bakıya səfərə gələn Rusiyanın müdafiə naziri Sergey Şoyqu prezident İlham Əliyevlə danışıqlar aparıb.

Dövlət başçısının mətbuat xidmətinin məlumatına görə, söhbət zamanı ikitərəfli münasibətlərə və regional təhlükəsizlik məsələlərinə toxunulub.

İlham Əliyev qeyd edib ki, bu yaxınlarda Putin ilə telefon söhbəti olub. Söhbət zamanı müəyyən məsələlər qaldırılıb. Əliyev və Şoyqunun görüşü haqqında başqa məlumat verilmir.

Qeyd edək ki, sözügedən söhbət zamanı Əliyev Putin qarşısında Tovuz istiqamətində döyüş əməliyyatları zamanı (12-16 iyul) Ermənistana 400 ton silah göndərilməsi məsələsini qaldırıb.

Prezident İlham Əliyev deyib ki, Ermənistanın təxribatının məqsədi KTMT-ni Ermənistan-Azərbaycan münaqişəsinə cəlb etmək idi. Bu zaman Rusiyadan Ermənistana hərbi yüklərin göndərilməsi intensivliyi Azərbaycan ictimaiyyətində narahatlıq və ciddi suallar doğurub. Əliyev qeyd edib ki, bu məsələ Putinə zənginin əsas səbəbidir.

Xatırladaq ki, həmin dövrdə Ermənistana göndərilən silahların böyük hissəsini pilotsuz uçan aparatlara qarşı mübarizə üçün nəzərdə tutulan radioelektron mübarizə sistemləri və digər hərbi texnika növləri təşkil edirdi. -02D-