Elmar Məmmədyarov Qoşulmama Hərəkatının nazirlər görüşünə yekun vurub

Bakı/24.10.19/Turan: Oktyabrın 24-də Bakıda Qoşulmama Hərəkatında iştirak edən ölkələrin xarici işlər nazirlərinin iki günlük görüşü başa çatıb.

Müzakirələrə yekun vuran Azərbaycan XİN başçısı Elmar Məmmədyarov qeyd edib ki, aparılan müzakirələr Qoşulmama Hərəkatının beynəlxalq sülh və təhlükəsizliyin möhkəmlənməsində mühüm rol oynadığını nümayiş etdirib.

“Sizinlə razılaşdırdığımız hərtərəfli sənədlərdə bu baxımdan bir neçə vacib məqam yer alır. Bu gün çoxtərəflilik heç vaxt olmadığı qədər vacibdir və bu dəyərli çərçivəni qorumaq bizim məsuliyyətimizdir.

Qoşulmama Hərəkatı Birləşmiş Millətlər Təşkilatından sonra ikinci ən böyük beynəlxalq siyasi təşkilat olaraq, çoxtərəfli əməkdaşlığın əsas hərəkətverici qüvvələrindən biridir. Bu hörmətli Hərəkatın sədrliyini üzərimizə götürməkdən və onun qarşıdan gələn uğurlarına töhfəmizi verməkdən qürur duyuruq. İnanırıq ki, bu Zirvə və sədrliyimiz boyunca sizin dəstəyinizlə Hərəkatın beynəlxalq münasibətlər sistemindəki rolunu gücləndirə biləcəyik. Bundan əlavə, inanırıq ki, sədrliyimiz Qoşulmama Hərəkatının üzvü olmayanlarla əməkdaşlıq çərçivəsi qurmağa kömək edəcəkdir”, deyə Məmmədyarov bildirib.

Dövlət başçıları sammiti 25-26 oktyabr tarixlərində Bakıda keçiriləcək. -06D-