Ermənilər Azərbaycana işləyən casusun həbs olunduğunu bildiriblər

Bakı/01.10.20/Turan: Bu gün Ermənistan Milli Təhlükəsizlik Xidməti (MTX) Azərbaycan kəşfiyyatına çalışan keçmiş yüksək rütbəli hərbçinin həbsi barədə məlumat verib.

Məlumatda deyilir ki, keçmiş zabit uzun illər məsul vəzifələr tutub və bu müddətdə dövlət sirri olan məlumatları Azərbaycana ötürüb.

O, Gürcüstanda olarkən Azərbaycanın xüsusi xidmət orqanlarının nümayəndələri tərəfindən ələ alınıb. Dövlət sirrini ehtiva edən informasiyaya çıxışı olan bu şəxs hərbi texnika, yüksək əhəmiyyətli obyektlər, şəxsi heyət və ehtiyat haqda məlumatlar toplayıb. Ermənistan SQ və Qarabağdakı əlaqələrindən istifadə edərək vaxtaşırı həmkarları, sonra isə Gürcüstanda Azərbaycanın kəşfiyyat xidmətinin nümayəndələri ilə görüşüb. Görüşlərin bir hissəsi Azərbaycan səfirliyinin ərazisində keçirilib. Görüşlərlə yanaşı o, telefonla əlaqə saxlayaraq aldığı məlumatları ötürüb, Ermənistan MTN bildirir.

Keçmiş hərbçinin adı açıqlanmır, ona qarşı dövlətə xəyanət ittihamı irəli sürülüb, o həbs edilib. -02D-