Ermənilər Qarabağda 54 min hektar meşə məhv ediblər

Bakı/29.01.21/Turan: Otuz il ərzində ermənilər tərəfindən Azərbaycan ərazilərinin işğalı nəticəsində 54 min hektardan çox meşə məhv edilib. Bu barədə Azərbaycan ekologiya və təbii sərvətlər nazirinin müavini Firdovsi Əliyev cümə günü mətbuat konfransında məlumat verib. Onun sözlərinə görə, əsasən Qubadlı rayonunda meşə örtüyünün bərpası üzrə işlərə başlanılıb. Digər yerlərdə də analoji addımlar atılacaq.

Ekologiya və təbii sərvətlər nazirinin digər müavini Vüqar Kərimov qeyd edib ki, Azərbaycan hakimiyyəti ermənilərin vurduğu ziyanın qiymətləndirilməsi üzərində işləyir, qiymətləndirmələrin nəticələrindən müvafiq iddiaların verilməsi zamanı istifadə olunacaq. Bu məqsədlə beynəlxalq ekspertlərin cəlb edilməsi nəzərdə tutulur.

O, zərərin miqyasına toxunaraq, onları "fəlakətli" adlandırıb. Söhbət təkcə meşələrdən deyil, həm də on illərlə xarici şirkətlərin iştirakı ilə amansızcasına istismar olunan faydalı qazıntılardan, su ehtiyatlarından gedir.

Eyni zamanda, ərazilərin işğaldan azad edilməsi yay mövsümündə su qıtlığına məruz qalan Azərbaycanın aran rayonlarının su təchizatının yaxşılaşdırılmasına imkan verəcək. Belə ki, ölkənin su ehtiyatlarının təxminən 30% -i azad edilmiş rayonların ərazilərindədir, V.Kərimov bildirib.

O, azad edilmiş ərazilərdə yeni qoruqların və milli parkların yaradılacağını istisna etməyib. V.Kərimov deyib ki, bu məsələlər beynəlxalq ekspertlərin cəlb edilməsilə həll olunacaq. -02D-