İran və Türkiyə XİN rəhbərləri Cənubi Qafqaz üzrə mövqelərini tutuşdurublar

Bakı/29.01.21/Turan: Yanvarın 29-da İstanbulda İran və Türkiyə xarici işlər nazirləri Məhəmməd Cavad Zərifin və Mövlud Çavuşoğlunun danışıqları birgə mətbuat konfransında mətbuat üçün ümidverici bəyanatlarla başa çatıb.

“Anadolu” agentliyinin məlumatına görə, Zərif tezliklə Tehranda  İran, Türkiyə və Azərbaycan xarici işlər nazirlərinin üçtərəfli görüşü barədə məlumat verib.

O deyib ki, onun regionun beş ölkəsinə turnesi yeni əməkdaşlıq platformasının yaradılması ilə bağlı Türkiyə, Azərbaycan liderlərinin irəli sürdükləri ideyaya cavab olub.

O, Ankara ilə qarşılıqlı əlaqələri yüksək qiymətləndirib və qeyd edib ki, çətin dövrlərdə İran və Türkiyə bir-birini daim dəstəkləyib və bu münasibətlər davam etdiriləcək. Zərifin sözlərinə görə, bu gün Tehran və Ankara üçün Qafqazda da əməkdaşlıq üzrə yeni imkanlar açılıb.

Zərif həmçinin bildirib ki, türkiyəli həmkarı ilə görüşdə Əfqanıstan, Türkiyə və İran arasında üçtərəfli dialoq mexanizminin formalaşdırılması ilə bağlı Kabilin təklifini müzakirə edib. "İran - Türkiyə əməkdaşlığı çox ümidvericidir. ABŞ daha müdrik mövqe tutarsa, Ankara ilə Tehran arasında münasibətlər daha da möhkəmlənəcək", - İran diplomatiyasının rəhbəri  deyib.

"Cənubi Qafqazda sabitlik və sülh ilk növbədə, region ölkələrinin özlərinin maraqlarına cavab verir, Türkiyə XİN rəhbəri M.Çavuşoğlu deyib. Bu, əsasən yeni vəziyyətdən faydalanacaq Ermənistana aiddir. Biz Yerevanın bu istiqamətdə konstruktiv addımlar atacağını gözləyirik", - nazir bildirib.

Türkiyə diplomatiyasının rəhbəri Cənubi Qafqazda atəşkəs rejiminin uzunmüddətli saxlanmasının önəmini qeyd edib. "Sülhə hazır olmaqla bağlı bəzi sözlər kifayət deyil, real töhfə lazımdır. Biz Azərbaycan prezidenti İlham Əliyevin təklif etdiyi və Türkiyə ilə Rusiya prezidentlərinin, həmçinin regionun digər ölkələrinin rəhbərliyinin dəstəklədiyi "3+3" formulu üzrə əməkdaşlıq formatını inkişaf etdirməyi planlaşdırırıq", - nazir deyib.

M.Çavuşoğlu bildirib ki, Türkiyə-İran-Azərbaycan və ya Türkiyə-İran-Azərbaycan-Gürcüstan kimi çoxtərəfli formatlar ölkələr arasında dialoqun inkişafına mühüm töhfədir.

Türkiyə Zərifin regionun beş dövlətinə – Azərbaycan, Rusiya, Ermənistan, Gürcüstana beşgünlük turnesində yekun ölkədir. Turnedə məqsəd region ölkələrinin əməkdaşlıq platformasının yaradılmasıdır.—0—