Ermənilərin Su-25 təyyarəsi məhv edilib

Baku/02.11.20/Turan: Noyabrın 1-də gün ərzində Ermənistan-Azərbaycan dövlət sərhəddinin Zəngilan rayonu sahəsində Ermənistan Silahlı Qüvvələrinin bölmələri hücum etməyə cəhd göstərib.

Düşmən bu istiqamətdə bir sıra əlverişli yüksəklikləri ələ keçirmək məqsədilə minaatanlardan və müxtəlif iriçaplı silahlardan istifadə etməklə bölmələrimizin mövqelərini atəşə tutub. Bu barədə Azərbaycan Müdafiə Nazirliyinin məlumatında deyilir.

“Düşmənin hücuma keçmək niyyəti bölmələrimiz tərəfindən vaxtında aşkar edilib və həyata keçirilən uğurlu əməliyyat nəticəsində qarşı tərəf ciddi itkilərə məruz qalıb.

Döyüş nəticəsində 30-dək canlı qüvvə itırən düşmən Ermənistan ərazisinə çəkilməyə məcbur edilib.

Bölmələrimizin şəxsi heyətinin sayıqlığı nəticəsində mövqelərimizə havadan hücum edən düşmənin Su-25 döyüş təyyarəsi də məhv edilib”, - məlumatda bildirilir.—06D-