Ermənistan Silahlı Qüvvələrinin 556-cı alayının taboru darmadağın edilib

Bakı/21.10.20/Turan: Cəbrayıl istiqamətində gedən döyüş əməliyyatları zamanı Azərbaycan ordusu tərəfindən görülən tədbirlər nəticəsində Ermənistan silahlı qüvvələrinin 556-cı alayının taboru məhv edilib. Bu barədə oktyabrın 21-də səhər Azərbaycan Müdafiə Nazirliyinin mətbuat xidməti məlumat verib.

Təqribən 400 nəfər müqaviləli hərbi qulluqçudan ibarət taborun şəxsi heyətinin əksəriyyəti sıradan çıxarılıb. Hərbi hissə yenidən komplektləşdirilməsi üçün Ermənistanın Ararat şəhərinə qayıdıb.

Məlum olub ki, alay komandiri qalan şəxsi heyəti yenidən döyüşə göndərməkdən imtina etdiyinə görə tutduğu vəzifədən azad olunub. Döyüşə getməkdən imtina etdikləri üçün hərbi qulluqçuların çoxu cinayət məsuliyyətinə cəlb olunub.

Xatırladaq ki, gecə döyüşləri zamanı ermənilərin həmin ərazidə bir neçə digər bölmələrinə ciddi ziyan dəyib və onların Xudafərin ərazisində əks-hücum cəhdi dəf edilib.

Bundan öncə Ermənistan tərəfi bu istiqamətdə “böyük” uğur haqda raport vermişdi. Guya ermənilər azərbaycanlı hərbçilər üçün cəhənnəm düzəldiblər. Görünür, ermənilər belə miflərlə öz ordusunun döyüş ruhunu yüksəltməyə çalışırlar.-02D-