Ermənistanda müdafiə nazirinin ortağı keyfiyyətsiz silah tədarükünə görə həbs edilib

Bakı/01.02.21/Turan: Ermənistanın Milli Təhlükəsizlik Xidməti Müdafiə Nazirliyinə köhnə və yararsız artilleriya mərmilərinin tədarükündə ittiham olunan biznesmen David Qalstyanı (Patron Davo kimi məşhurdur) saxlayıb.

David Qalstyan xaricdə qeydiyyatdan keçirilmiş şirkətin şura sədri olaraq xüsusilə külli miqdarda vəsaiti mənimsəmək məqsədilə Müdafiə Nazirliyi ilə 1983-1986-cı ildə istehsal edilmiş artilleriya mərmilərinin tədarükü barədə müqavilə bağlayıb. Amma əslində 1977-ci ilin istehsalı olan köhnə mərmilər tədarük edilib.

Bu mərmilər Ermənistan tərəfin uğursuzluqlarına səbəb olub, tədarükçü isə bundan bir milyon dollardan çox vəsait qazanıb.

Eyni zamanda, qeyd edilir ki, Milli Təhlükəsizlik Xidmətində Müdafiə Nazirliyinə tədarük zamanı korrupsiya mexanizmlərindən istifadə etməklə yol verilmiş sui-istifadələr haqqında digər cinayət işləri də araşdırılır.

Ermənistan müxalifəti dəfələrlə bildirib ki, Müdafiə Nazirliyi köhnə və ya yararsız hərbi texnika alır. Bu zaman satınalmalar müdafiə naziri David Tonoyanın biznes ortağı olan Qalstyan vasitəsilə həyata keçirilir. -02D-