Ermənistanın Azərbaycandan Beynəlxalq Məhkəməyə şikayəti əsassız və absurddur

Bakı/30.09.23/Turan: İrqi ayrı-seçkiliyin bütün formalarının ləğvi haqqında Beynəlxalq Konvensiyanın Azərbaycana tətbiqilə bağlı məhkəmə işi üzrə müvəqqəti tədbirlərin təyin edilməsi məqsədilə sentyabrın 29-da Ermənistanın Birləşmiş Millətlər Təşkilatı Beynəlxalq Məhkəməsinə irəli sürdüyü növbəti iddialar tamamilə əsassız və absurddur. Bu barədə Azərbaycan Xarici İşlər Nazirliyinin rəsmi nümayəndəsi Ayxan Hacızadə bildirib.

"Ermənistanın Azərbaycanın ərazi bütövlüyünə və suverenliyinə iddialarından əl çəkməməsi, azərbaycanlılara qarşı nifrətin qızışdırılması məqsədilə yeni iddialar irəli sürməsi, qeyd olunan iş üzrə Beynəlxalq Məhkəmənin əvvəlki qərarına məhəl qoymaması tamamilə qəbuledilməzdir", -  Hacızadə deyib.

Ermənistan "öz məkrli siyasətini irəlilətmək üçün" Birləşmiş Millətlər Təşkilatı Təhlükəsizlik Şurasında olduğu kimi, Birləşmiş Millətlər Təşkilatı Beynəlxalq Məhkəməsindən də sui-istifadə edir.

"Təkcə 2023-cü ildə Ermənistan artıq üçüncü dəfədir ki, bu məhkəməyə müraciət edir. Xatırladım ki, Ermənistanın yanvarda qaldırdığı üç vəsatətdən ikisi təmin edilməyin, biri məhdud qaydada təmin edilib. Mayda Ermənistanın qaldırdığı vəsatətlər iyulda məhkəmə tərəfindən yekdilliklə rədd edilib", - Hacızadə vurğulayıb.

Azərbaycan tərəfi məhkəməyə öz mövqeyini təqdim edəcək və orada Ermənistanın əsassız iddialarına tam cavablar əksini tapacaq, diplomat bildirib.

2022-ci ilin fevralında Birləşmiş Millətlər Təşkilatı Beynəlxalq Məhkəməsi Ermənistanın şikayəti əsasında Azərbaycana "Laçın dəhlizi boyunca adamların, nəqliyyat vasitələrinin və yüklərin maneəsiz hərəkətini təmin etmək üçün ondan asılı olan bütün tədbirləri" görməyi həvalə edib.  Eyni zamanda, Beynəlxalq Məhkəmə Xankəndi-Laçın yolunda azərbaycanlı ekofəalların aksiyasının “Azərbaycan hökuməti tərəfindən təşkil olunmasını” və "Azərbaycanın təbii qazın və digər kommunal xidmətlərin (məsələn, elektrik enerjisi və internet xidmətləri) verilməsinə mane olmasını" tanımaqla bağlı Ermənistanın tələbini təmin etməyib.

İyulda Birləşmiş Millətlər Təşkilatı Beynəlxalq Məhkəməsi Azərbaycanın iki ölkənin şərti sərhədində "Laçın" sərhəd-keçid məntəqəsini qurmasının qanunsuz sayılması barədə Ermənistanın vəsatətini təmin etməyib.

Birləşmiş Millətlər Təşkilatı Beynəlxalq Məhkəməsi Azərbaycanın öz ərazisində sərhəd nəzarət-keçid məntəqəsi yaratmasını onun suveren hüququ kimi tanıyıb. 06B