Fazil Qasımov 25 gündür istintaq təcridxanasında aclıq edir

İstanbul Universitetinin doktorantı, iqtisadçı Fazil Qasımov 25 gündür ki, 1 saylı Bakı İstintaq Təcridxanasında aclıq edir. Bu barədə Turan-a onun qardaşı Nazim Qasımov bildirib.

"Fazil dünən təcridxanadan zəng edib. Aclığı dayandırması üçün yalvarışlarımıza baxmayaraq, sonadək davam etdirəcəyini bildirdi. Səsi eşidilməz dərəcədə zəif idi. Dedi təzyiqi kəskin düşüb, gözləri qaralır, başı gicəllənir. Fazil dərman qəbulundan tam imtina edib. Yalnız su qəbul edir. Hələ də ümimi kamerada saxlanılır. Özü çağıranda həkim gəlib təzyiqini ölçür”, - Nazim Qasımov deyib.

Fazil  Qasımov həbsdən azad edilməsinə israr edir.  

“Fazil dedi ki, ya sonadək aclıq edəcək, ya da onu azad edəcəklər. Biz ondan ötrü çox narahatıq. Onu itirmək istəmirik", - Nazim Qasımov deyib.

Fazil Qasımovun vəkili Rövşanə Rəhimova isə Turan-a bildirib ki, F. Qasımovun səhhətilə bağlı vəziyyəti istintaq təcridxanasının rəhbərliyilə müzakirə edib.

Onun sözlərinə görə, təcridxana rəhbərliyi Qasımovun səhhətinin "həkimlərin nəzarəti altında olduğunu" bildirib. Bu günlərdə onun müalicə müəssisəsinə köçürülməsi məsələsi həll ediləcək.

Penitensiar Xidmətdən şərh almaq mümkün olmayıb.

İstanbul Universitetinin doktorantı, iqtisadçı-alim Fazil Qasımov 7 avqust 2023-cü ildə saxlanılaraq Azərbaycana gətirilib. Ona qarşı Cinayət Məcəlləsinin 204.3.1-ci maddəsilə (mütəşəkkil qrupun tərkibində saxta pulların hazırlanması, əldə edilməsi və ya satışı) ittiham irəli sürülüb.

Qasımovun istintaqa ifadəsində bildirilir ki, o, saxta pulları hazırda polisin nəzarətində olan müxalifətçi siyasətçi Qubad İbadoğluna verib.

Bu yaxınlarda Qasımov baş prokuror, ombudsman, yerli və beynəlxalq ictimaiyyətə müraciətində bildirib ki, bu ifadələri işgəncə altında verib.

O bu  ifadələrdən imtina edib,  İbadoğluna saxta pullar vermədiyini, onunla heç vaxt FETO  (din xadimi Fətullah Gülən hərəkatı, Türkiyədə terror təşkilatı kimi tanınıb) mövzusunda və dini mövzularda müzakirələr aparmadığını bildirib.

Fazil Qasımov əsassız cinayət təqibinə və ibtidai istintaq dövründə işgəncələrə etiraz olaraq aclıq edir.