Gəncə "Toçka-U" taktiki raketi ilə atəşə tutulub

Bakı/11.10.20/Turan: Gəncə gecə "Toçka-U" əməliyyat-taktiki raket sistemindən atəşə tutulub. Bu barədə Gəncədə keçirilən bugünki mətbuat konfransında dövlət başçısının köməkçisi Hikmət Hacıyev bildirib. 

O qeyd edib ki, şəhərə atəşkəs haqqında saziş qüvvəyə mindikdən sonra atəş açılıb. "Bu, soyqırım aktı və hərbi cinayətdir, beynəlxalq təşkilatlar bu barədə məlumatlandırılıb", deyə o qeyd edib.

Öz növbəsində, ölkənin baş prokurorlu Kamran Əliyev baş verənləri beynəlxalq terrorizm aktı adlandırıb. "Faktla bağlı cinayət işi açılıb və bu cinayətdə təqsirli olanların müəyyən edilməsi və məsuliyyətə cəlb edilməsi üçün bütün tədbirlər görüləcək", deyə baş prokuror bildirib.

Mingəçevir şəhərinə qarşı da bənzər terror aktı törədilib, Cənubi Qafqazın ən böyük SES-i - Mingəçevir SES raket atəşinə məruz qalıb. Amma Ermənistan ərazisindən buraxılan raketlər Azərbaycan HHQ tərəfindən məhv edilib.

Xatırladaq ki, yaşayış evinə raket düşməsi nəticəsində 9 nəfər həlak olub, 34 nəfər yaralanıb.

Dağıntılar altında hələ də insanlar var. Xəsarət alanların sayı arta bilər. -02D-