General Hikmət Həsənovun minaya düşməsi faktı ilə bağlı istintaq aparılır

Bakı/16.11.21/Turan: Azərbaycan silaqhlı qüvvələrinin birinci ordu korpusunun keçmiş komandiri, general-mayor Hikmət Həsənovun minaya düşməsi ilə bağlı cinayət işi üzrə istintaq aparılır. Yerli KİV-lərdə yayılan bu məlumatı Baş Prokurorluğun mətbuat xidmətindən Turan-a təsdiq ediblər.

"General-mayor Hikmət Həsənovun 2020-ci il noyabrın 20-də zirehli maşınla işğaldan azad edilmiş Ağdam rayonunun girişində minaya düşməsi ilə əlaqədar Hərbi Prokurorluqda cinayət işi açılıb, 29, 120.2.7 (qəsdən iki və daha çox şəxsi öldürmə) və 29, 120.2.12-ci (milli, irqi, dini ədavət və ya düşmənçilik niyyəti ilə adam öldürmə) maddələrlə istintaq aparılır", deyə Baş Prokurorluqdan bildiriblər.

Son günlər yerli KİV-lərdə 20 noyabr 2020-ci il tarixində Həsənovun (müharibənin başa çatmasından 10 gün sonra) zirehli maşınla minaya düşməsi nəticəsində ağır xəsarət alması, xüsusən onurğasında üç sınıq əmələ gəlməsi və onun müalicəsinin indiyədək davam etməsi haqqında məlumatlar yayılır.

Eyni zamanda, keçmiş hərbiçilər internet kanallarında Həsənovun "Tərtər işi" çərçivəsində işgəncələrdə iştirak etdiyini bildirirlər. Onlar 2016-cı ilin aprelində Tərtər rayonunun Seysulan kəndinin azad edilməsi əməliyyatının məhz Həsənovun təqsiri ucbatından uğursuzluğa düçar olduğunu və azad edilmiş Talış kəndindəki hərbiçilər qrupuna dəstək göndərilmədiyini iddia edirlər. Buna görə əlavə qüvvələrin dəstəyini ala bilməyən Azərbaycan xüsusi təyinatlıları geri çəkilmək məcburiyyətində qalıb.

O vaxtki Baş Qərargah rəhbərliyinin məhz bu uğursuzluğu öz üstündən atmaq üçün "dövlətə xəyanət" haqqında iş açdığı, yüzlərlə hərbiçinin saxlanıldığı iddia edilir. Onlardan onlarla hərbiçi həbs edilib, 11 nəfərə isə ölənə qədər işgəncə edilib.

Bütün bu müddət ərzində Həsənov susurdu və bu ittihamlara münasibət bildirmirdi. Bu ilin avqustunda 46 yaşlı Həsənov Birinci Korpusun Komandiri vəzifəsindən azad edilib və vəzifəsi hərbi akademiyanın rəis müavinliyinə qədər azaldılıb. Həsənovun özündən şərh almaq mümkün olmayıb.

Maraqlıdır ki, Həsənovun Ağdamda minaya düşməsindən 3 gün sonra polkovnik Babək Səmidli də Suqovuşanda minaya düşüb və həlak olub.

"Tərtər işi"nin fiqurantı olan və ağır işgəncələrə məruz qalan keçmiş hərbi kəşfiyyatçı Elmar Allahverdiyevin iddiasına görə, Səmidli Həsənovun yaxın adamı idi və ittihamların saxtalaşdırılmasında o da iştirak edib. 

Azərbaycan hərbi prokuroru Xanlar Vəliyev də noyabrın 2-də jurnalistlərlə söhbətində işgəncə faktlarını etiraf edib.

"Yalnız Tərtər işi ilə bağlı işgəncələrə yol verilməsi haqqında iş üzrə 100-dən çox insanın müxtəlif fiziki şiddət formalarına məruz qaldığını müəyyən etmişik". Onun sözlərinə görə, istintaq zamanı bəzi insanlar məsuliyyətə cəlb edilib, sonradan onların təqsirsiz olduğu məlum olub: "Buna görə bu şəxslər barəsində cinayət işinə xitam verilib", deyə Vəliyev bildirib.

Onun sözlərinə görə, Hərbi Prokurorluq tərəfindən dövlətə xəyanətdə şübhəli bilinən şəxslərlə bağlı araşdırma aparılana qədər ciddi fiziki şiddətə yol verilib. Bunun nəticəsində bir nəfər həlak olub. Hərbi qulluqçulara qarşı qanunsuz olaraq kütləvi şəkildə işgəncələrə yol verilib. Buna görə eyni vaxtda 16 müxtəlif vəzifəli şəxsə qarşı cinayət işi açılıb və onlar uzunmüddətli azadlıqdan məhrumetmə cəzalarına məhkum ediliblər. Bununla yanaşı, Vəliyev "Tərtər işi" ilə bağlı bəzi şəxslərə qarşı ittihamların əsassız olduğunu bildirib. -06D-