General Kərim Vəliyev Azərbaycan SQ Baş Qərargah rəisi təyin edilib

Bakı/23.07.21/Turan: Ölkə prezidentinin 23 iyul tarixli sərəncamı ilə general-leytenant Kərim Vəliyev Azərbaycan Ordusunun Baş Qərargah rəisi təyin edilib.

Bu günə qədər general-leytenant Vəliyev müdafiə nazirinin müavini – Şəxsi Heyət Baş İdarəsinin rəisi vəzifəsini tuturdu.

Vəliyev 9 fevral 1961-ci ildə Bakı şəhərində anadan olub. 1982-cü ildə Bakı Ali Ümumqoşun Komandirlər Məktəbini fərqlənmə ilə bitirib.

1982-1990-cı illərdə SSRİ Silahlı Qüvvələri tərkibində kursant taqım komandiri, tədris şöbə rəisinin köməkçisi, tədris şöbə rəisinin baş köməkçisi vəzifələrində xidmət edib. 1990-1994-cü illərdə Frunze adına Hərbi Akademiyada qiyabi təhsil alıb.

1992-ci ildən Azərbaycan Respublikası Silahlı Qüvvələrində tədris şöbə rəisinin müavini, briqada komandiri, cəbhə komandanının müavini, Müdafiə nazirinin döyüş əməliyyatları üzrə müavini, hərbi birlik komandiri, Hərbi Elmi Mərkəzin rəisi, Müdafiənin Planlaşdırılmasının Hərbi Strategiyası İdarəsinin rəisi vəzifələrində xidmət edib.

İkinci Qarabağ Müharibəsi başa çatdıqdan sonra “Zəfər” ordeni, həmçinin “Cəbrayılın azad olunmasına görə”, “Ağdamın azad olunmasına görə”, “Qubadlının azad olunmasına görə” medalları ilə təltif olunub.

Xatırladaq ki, ondan əvvəlki Baş Qərargah rəisi Nəcməddin Sadıqov İkinci Qarabağ Müharibəsinin başlanğıcında heç bir izahat verilmədən səssiz-sədasız vəzifədən kənarlaşdırılıb. Qeyri-rəsmi məlumatlara görə, buna müharibənin əvvəlində bir sıra hərbi uğursuzluqlar səbəb olub. -02D-