Gömrük xidmətinin iki vəzifəli əməkdaşı həbs edilib

Bakı/27.01.23/Turan: Baş prokuror yanında Korrupsiyaya qarşı Mübarizə Baş İdarəsinin Dövlət Gömrük Komitəsi ilə birgə keçirdiyi əməliyyat zamanı gömrük əməkdaşlarının qanunsuz əməlləri aşkarlanıb.

Baş Prokurorluğun mətbuat xidmətinin məlumatında deyilir ki, Komitənin Aksizli Mallar üzrə Baş Gömrük İdarəsi gömrük dəyərləndirilməsi və risklərin idarə olunması şöbəsinin əməkdaşı Şahin İskəndərovun ölkəyə gətirilmiş avtomobillərə görə ödəniləcək rüsum və digər xərclərin azaldılması müqabilində rüşvət almasına əsaslı şübhələr müəyyən edilib.

Həmçinin Şirvanlı gömrük postunun əməkdaşı Cavid Məmmədovun postda yoxlama tədbirlərinin səthi və sürətli aparılması müqabilində rüşvət alması aşkar edilib.

Bundan əlavə, Cavid Məmmədov dəfələrlə bəyan edilmədən Rusiyaya qanunsuz vəsait keçirilməsinə köməklik göstərməsi müqabilində vətəndaşlardan rüşvət almaqda şübhəli bilinib.

Faktlar üzrə cinayət işləri başlanıb. Şahin İsgəndərova və Cavid Məmmədova  Cinayət Məcəlləsinin 311.2 (rüşvət alma) və 311.3.2-ci (təkrar rüşvət alma) maddələrilə ittiham elan edilib. Məhkəmənin qərarı ilə onlar həbs olunub. İstintaq davam edir.05D06