Gürcüstan Daxili İşlər Nazirliyi Dmanisidə vəziyyət barədə (yenilənib)

Bakı/17.05.21/Turan: Gürcüstan Daxili İşlər Nazirliyi Dmanisi sakinlərini iğtişaşları dayandırmağa və hüquq-mühafizə orqanlarının tələblərinə tabe olmağa çağırır. Bu rayon mərkəzində ikinci sutkadır ki, iğtişaşlar davam edir və azərbaycanlılarla gürcülər arasında toqquşmalar baş verir.

"Dmanisidə qarşıdurmanın təkrarlanmasının və vəziyyətin süni şəkildə gərginləşməsinin qarşısını almaq üçün Daxili İşlər Nazirliyinin əməkdaşları ictimai asayişi qorumaq üçün səfərbər olunublar.

Daxili İşlər Nazirliyi münaqişə edən tərəfləri polisin qanuni tələblərinə tabe olmağa və məişət münaqişəsinin süni şəkildə etnik qarşıdurmaya çevrilməsinə imkan verməmək üçün əmin-amanlığı qorumağa çağırır", - bəyanatda bildirilir.

Dmanisidə etnik azərbaycanlılar və Svanetiyadan (Gürcüstanın dağ regionu) olan miqrantlar arasındakı münaqişə  baş verib. Tədricən münaqişə müxtəlif vasitələrdən istifadə olunmaqla qanlı çəkişməyə çevrilib.  Sonradan məlum olub ki, bir mağazanın azərbaycanlı sahibi svanlara borca pivə satmaqdan imtina etdikdən sonra vəziyyət gərginləşib. Buna cavab olaraq, svanlar mağazaya hücum ediblər və sahibini döyüblər.

Bazar ertəsi səhərdən bütün şəhərdə iğtişaşlar başlayıb və yüzlərlə insan orada iştirak edir. Etnik azərbaycanlılar səhərdən küçələrə çıxıblar və dünən kütləvi dava törədən, azərbaycanlı ailəyə məxsus mağazanı dağıdan şəxslərin üzr istəməsini və cəzalandırılmasını tələb edirlər.

Dəyənəklərlə silahlanmış gənclərin bir hissəsi şvanların evlərini dağıtmaqla hədələyib.

Hadisə yerinə əlavə polis qüvvələri səfərbər olunub, ancaq iğtişaşlar davam edir. Polislər də daxil olmaqla zərər çəkənlər və saxlanılanlar var. -02D-

*   *   *

2021 May 17 (Bazar ertəsi) 12:51:16

Dmanisidə gürcülərlə azərbaycanlılar arasında kütləvi toqquşmalar

Bakı/17.05.21/Turan: Gürcüstanın Dmanisi rayonunda gürcülərlə azərbaycanlılar arasında kütləvi toqquşmalar iki gündür ki, davam edir.

Münaqişə mayın 16-da axşam başlayıb. Bir qrup gürcü azərbaycanlıların mağazasına hücum edərək oranı dağıdıb, mağaza sahibini döyüb. Bundan sonra qarşıdurma rayon mərkəzinin küçələrində davam edib. Hadisə yerinə gələn polislər münaqişənin qarşını ala bilməyiblər və genişlənməyə davam edir.

Bu gün iğtişaşlar davam edib. "Mtavari arxi" telekanalının reportyorlarının videokadrlarında yüzlərlə qəzəbli insan görünür ki, onlar münasibətləri dəyənək və daşlardan istifadə edərək aydınlaşdırırlar.

Qarşıdurmanın səbəbi aydın deyil. Gürcüstan kütləvi informasiya vasitələrinin məlumatına görə, gürcülər mağazada onlara borca mal verilməməsindən narazıdırlar. Gürcüstan hakimiyyəti baş verənlərlə bağlı bəyanatla çıxış etmir. -02D-