Gürcüstan prezidenti baş nazir təyinatı ilə bağlı maskarada son qoyulmasına çağırıb

Tbilisi/14.06.18/Turan: "Hakim partiyanın lideri Bidzina İvanişvili baş nazir olmalıdır", - Gürcüstan prezidenti Georgi Marqvelaşvili bildirib.

Onun sözlərinə görə, Gürcüstanda maskarada son qoymaq lazımdır, ictimaiyyət baş nazirləri kimin və niyə çıxardığını bilmir.

"Dünən baş nazir vəzifədən getdi və dedi ki, partiya sədrinə, yəni, Bidzina İvanişviliyə imkan yaratmalıdır ki, yeni hökuməti formalaşdırsın. Hesab edirəm ki, bu prosesləri cəmiyyət başa düşməlidir. İctimaiyyətə aydın olmalıdır ki, niyə uğurlu baş nazirlər qəflətən öz vəzifəsindən gedir. Əvvəlki baş nazir Qaribaşvili ilə də belə olmuşdu.

Əgər biz Avropa seçimindən danışırıqsa, Avropa dövlətinin formalaşdırılmasından danışırıqsa orada baş nazirlər hakim partiyaların liderləridir. Buna uyğun olaraq, əgər biz məsuliyyətli siyasətdən və cəmiyyət üçün aydın olan dövlət prosesinin formalaşmasından danışırıqsa, Bidzina İvanişvili baş nazir olmalıdır, - G.Marqvelaşvili vurğulayıb.-02D-