Hakim partiyanın sədr müavini həmkarlarını müxalifəti maliyyələşdirməkdə ittiham edib

Bakı/09.09.19/Turan: Hakim Yeni Azərbaycan Partiyası İdarə Heyətinin üzvləri müxalifəti maliyyələşdirirlər. Bu sensasion bəyanatla ötən cümə günü həmin partiya sədrinin müavini Siyavuş Novruzov çıxış edib.

Partiyanın bölgə rəhbərlərinin müşavirəsində çıxış edən S.Novruzov bildirib ki, İdarə Heyətinin bəzi üzvləri, əvvəllər uzun illər nazir işləmiş şəxslər indi xaricə qaçıblar və müxalifəti maliyyələşdirirlər. "Bizdə konkret siyahı var", - o deyib, lakin konkret ad açıqlamayıb.

Qeyd edək ki, S.Novruzovun çıxışını bir sıra hökumətyönlü KİV dərc edib. Lakin çıxışın mətni Yeni Azərbaycan Partiyasının saytında yoxdur.

Turan-ın S.Novruzov ilə əlaqə yaratmaq və şərh almaq cəhdləri nəticə verməyib. İdarə Heyətinin digər üzvləri də şərh verməkdən imtina ediblər.

Lakin üç keçmiş nazir - təhsil naziri Misir Mərdanov, ekologiya və təbii sərvətlər naziri Hüseynqulu Bağırov və nəqliyyat naziri Ziya Məmmədov bəyanatla çıxış edərək müxalifətin maliyyələşdirilməsinə bağlı olduqlarını inkar ediblər.

Qeyd edək ki, indiyədək hakim partiya və iqtidar Qərbi hakimiyyəti devirmək məqsədilə müxalifəti maliyyələşdirməkdə ittiham ediblər.-03B-