Hande Harmançı: "Britaniya ştammı"nın Azərbaycana gəlməyəcəyini düşünmək olmaz

Bakı/02.02.21/Turan: “Hazırda Azərbaycanda COVID-19 pandemiyası ilə bağlı vəziyyət sabitləşib. Lakin unutmamalıyıq ki, nə dünyada, nə də Azərbaycanda pandemiya bitməyib".

Bu barədə Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmançı mətbuata açıqlamasında deyib.

“Yoluxma sayının azalması sərt karantin rejimi və məhdudiyyətlərin nəticəsidir. Məhdudiyyətlər götürüldüyü zaman istər-istəməz rəqəmlər yenidən artacaq. Buna görə hər kəs qaydalara məsuliyyətlə yanaşmağa davam etməlidir. Bu halda vəziyyəti olduğu kimi saxlaya bilərik", - deyə o bildirib.

Onun sözlərinə görə, koronavirusda yeni mutasiyaların ortaya çıxması qaçılmazdır: ilkin araşdırmalar Britaniya ştammının daha yoluxucu olduğunu göstərib. Ancaq mövcud testlər vasitəsilə aşkarlana bilər və hazırlanan peyvəndlər həmin ştamma qarşı təsirlidir. Hazırda onun yolxuculuğunun 50-70 faiz çox olduğu məlumdur. Lakin öldürücülüyünün artması barədə dəqiq nəticələr yoxdur.

Hazırda yeni ştamma indiyədək təxminən 50 ölkədə rast gəlinib.

“Azərbaycana gəlməyəcək deyə düşünməyə dəyməz, lakin hər kəs nə edəcəyini, virusla mübarizədə nəyin faydalı olduğunu bilir”, - deyə Harmançı bildirib.—06D-