Helsinkidə Blinken Rusiyanın strateji uğursuzluğundan danışacaq

Vaşinqton/27.05.23/Turan: Gələn həftə ABŞ dövlət katibi Entoni Blinken NATO-nun yeni üzvü olan Finlandiyaya səfər edəcək, orada Rusiyanın Ukraynaya qarşı müharibədə strateji uğursuzluğuna dair mühüm nitq söyləyəcək, Turan-ın Vaşinqton müxbiri bildirib.

Blinken Helsinkiyə Osloda NATO ölkələrinin xarici işlər nazirlərilə görüşdən sonra gedəcək. O həmçinin İsveçə gedəcək.

Gələn cümə günü Helsinkidə Blinken öz çıxışında "Rusiyanın Ukraynaya qarşı təcavüzünün strateji uğursuzluğunun bütün aspektlərini, habelə Ukraynanın öz ərazisini, suverenliyini və demokratiyanı qorumasını dəstəkləmək üçün bizim davamlı səylərimizi işıqlandıracaq”, - dövlət katibinin Avropa üzrə müavininin köməkçisi Derek Hoqan Turan-ın müxbirinə bildirib.

Ümumilikdə, Blinkenin 29 may-2 iyun tarixlərində İsveç, Norveç və Finlandiyaya səfəri milli təhlükəsizlik və iqtisadiyyatın ən yüksək prioritetləri üzrə transatlantik əməkdaşlığın dərinləşdirilməsinə yönəlib.

NATO nazirlərinin Osloda qeyri-rəsmi görüşü zamanı Blinkenin Türkiyə və Macarıstanı İsveçin NATO-ya daxil olmasını ratifikasiya etməyə sövq edəcəyi gözlənilir.

“Türkiyə hökumətilə müttəfiqlər haqqında geniş söhbətlərimiz oldu, biz qəti əminik ki, İsveç NATO-ya üzv olmağa hazırdır. Odur ki, çox ümid edirik ki, Türkiyə və Macarıstan Vilnüs sammitinə qədər İsveçin Alyansa daxil olmasını ratifikasiya edəcəklər", -  o deyib.

"Biz Ukraynanın Avroatlantik səylərini çox dəstəkləyirik, lakin hazırda biz onun öz ərazi bütövlüyünü, suverenliyini qoruyub saxlaması üçün praktik dəstəyə diqqət yetiririk", - Hoqan Turan-ın “ABŞ Ukraynanın NATO-ya daxil olmasını dəstəkləyəcəkmi” sualının cavabında deyib. 0