Hikmət Hacıyev: “Azərbaycan yaralı erməni hərbçilərə tibbi yardım göstərməyə və onların evakuasiyasına kömək etməyə hazırdır”

Bakı/22.09.23/Turan: Azərbaycan prezidentinin köməkçisi Hikmət Hacıyev Beynəlxalq Qırmızı Xaç Komitəsinin Bakı ofisinin rəhbərliyi və digər beynəlxalq tərəfdaşlarla görüş keçirib.

"Azərbaycan Silahlı Qüvvələrinin beynəlxalq humanitar hüquqa ciddi riayət etməsi və 23 saat 51 dəqiqə davam edən lokal antiterror tədbirləri zamanı kənar ziyanın qarşısının alınması qeyd olunub. Ermənistanın baş nazirinin etiraf etdiyi kimi, dinc əhali arasında kütləvi qurban olmayıb. Bununla əlaqədar Avropa İttifaqı, Fransa və Almaniya rəsmi şəxslərinin yoxlanılmamış və qeyri - ciddi bəyanatları anlaşılmaz olaraq qalır", - Hacıyev X sosial platformasında yazıb.

Beynəlxalq Qırmızı Xaç Komitəsilə görüşdə Azərbaycan tərəfi bildirib ki, təşkilat vasitəsilə Laçın-Xankəndi və Ağdam-Xankəndi yolları ilə dərman, qida və digər məhsulların çatdırılması üçün bütün lazımi şərait yaradılıb və yaradılacaq.

"Azərbaycan tərəfi yaralı erməni hərbi qulluqçulara tibbi yardım göstərməyə və ya Beynəlxalq Qırmızı Xaç Komitəsinin vasitəsilə onlara kömək etməyə hazırdır. Tələbə əsasən, yaralı hərbçiləri toplamaq üçün Beynəlxalq Qırmızı Xaç Komitəsinin tibbi avtomobillərinin hərəkəti dəstəklənir. Bu məqsədlə biz də təcili tibbi yardım maşınları ayırmağa və tibbi yardım göstərməyə hazırıq", -  Hacıyev davam edib.

Ermənistana tibbi evakuasiya üçün bu ölkədən də tibbi nəqliyyat gələ bilər.

Savaş meydanında qalan yaraqlıların cəsədlərinin toplanması ilə bağlı rusiyalı sülhməramlılarla iş aparılır.

"Biz Beynəlxalq Qırmızı Xaç Komitəsinin Cenevrə ofisindən əlavə personalın qəbulunu dəstəkləyirik. Biz həmçinin Bakı ofisindən Xankəndi filialına əlavə personalın göndərilməsini dəstəkləyirik. Biz könüllü və fərdi seçim əsasında Xankəndi-Laçın yoluyla mülki şəxslərin öz nəqliyyatında hərəkətinin təhlükəsizliyini təmin edirik. Getmək istəyənlər əsasən hərbi qulluqçuların ailə üzvləridir.

Açıq şəkildə bəyan edirik ki, könüllü olaraq silahları yerə qoyan hərbçilər azaddır. Hərbi-mülki əməkdaşlıq konsepsiyası çərçivəsində Azərbaycan hərbçiləri və mülki personal yerlərdə mülki əhaliyə kömək edir və bunu davam etdirəcəklər", - Hacıyev bildirib.

Qeyd edək ki, teleqram-kanallarda məlumat yayılıb ki, Beynəlxalq Qırmızı Xaç Komitəsinin 6 nəqliyyat vasitəsi yaralıları götürmək üçün Xankəndidən Xocavəndə yola düşüb. 06B